Համազգայինի Լիբանանի Ընտանիքը եւ Բարեկամները Ապրեցան Յիշատակելի ու Անմոռանալի Պահ Մը. Հաղորդագրութիւն
Նախաձեռնութեամբ Համազգայինի Լիբանանի Շրջանային վարչութեան եւ կազմակերպութեամբ գեղարուեստի դպրոցներու խնամակալութեան ու «Քնար» պարախումբի վարչութեան, Շաբաթ, 15 Փետրուար 2020-ին, Համազգայինի Լիբանանի ընտանիքը եւ բարեկամները համախմբուեցան Ազգային առաջնորդարանի «Երջօ Սամուէլեան- Եռագոյն» սրահին մէջ եւ ապրեցան հայ երգի ունկնդրութեամբ յիշատակելի ու անմոռանալի պահ մը:
Արդարեւ, կազմակերպուած ճաշկերոյթին իր ժողովրդական, աշուղական, ազգագրական եւ ազգային երգերով ու մեկնաբանութեան իւրայատուկ ոճով մասնակից դարձաւ, այս առիթով հայրենիքէն հրաւիրուած տաղանդաւոր արուեստագէտ եւ ժողովրդային երգերու մեկնաբան Եւա Եկանեան: Երեկոն խանդավառեց նաեւ լիբանանահայ երգիչ եւ համազգայնական Վիգէն Տիշչէքէնեան:
Երեկոյին ներկայ գտնուեցաւ նաեւ Հայաստանի Հանրապետութեան արտակարգ եւ լիազօր դեսպան Վահագն Աթաբէկեան:
Խանդավառ մթնոլորտէն քաջալերուած ճաշկերոյթի ընթացքին կատարուեցան նաեւ սրտաբուխ նուիրատւութիւններ` Լիբանանի ապրած ընկերատնտեսական այսօրուան դժուար պայմաններուն մէջ կոկիկ եկամուտ մը ապահովուելով Համազգայինի գեղարուեստի տարբեր մարզերու գործունէութեան:
Ճաշկերոյթին Շրջանային վարչութեան բարի գալուստի խօսքը փոխանցեց ու յայտագիրը վարեց Շրջանային վարչութեան անդամ Նանոր Թաշճեան:
Ներկաները բաժնուեցան սրահէն հոգեպարար պահ մը ապրած ըլլալու եւ դարձեալ հանդիպելու տրամադրութեամբ ու ակնկալութեամբ:
ՀԱՄԱԶԳԱՅԻՆԻ ԼԻԲԱՆԱՆԻ
ՇՐՋԱՆԱՅԻՆ ՎԱՐՉՈՒԹԻՒՆ