Գէորգ Յարութիւնեան Տիրացաւ Քուրնոսովի Յուշամրցաշարքի Տիտղոսին

Չելիապինսքի մէջ (Ռուսիա) տեղի ունեցած Իկոր Քուրնոսովի յիշատակին նուիրուած արագ ճատրակի յուշամրցաշարքը նախորդ շաբաթավերջին վերջ գտաւ Հայաստանի ներկայացուցիչ Գէորգ Յարութիւնեանի յաղթանակով, որ առաւելագոյն 11 կէտէն 9,5 կէտ ապահովելով դարձաւ տիտղոսակիր:

Նշենք, որ Յարութիւնեան, որ առաջին ութ հանգրուանի ճակատումներուն արձանագրեց նոյնքան յաղթանակ, պարգեւատրուեցաւ 160 հազար ռուպլիով:

Հայաստանի մէկ այլ ներկայացուցիչը` Էրիկ Գասպարեան, 205 մասնակիցներուն մէջ 6,5 կէտով հանդիսացաւ 58-րդ, Էրիկ Չաքըրեան 6 կէտով` 84-րդ, նոյնքան կէտով 87-րդ` Սարգիս Մանուկեան, իսկ Հայկ Երիցեան 5,5 կէտով` 123-րդ: