Այժմեան Թուրքիոյ Մէջ Գտնուող Հայկական Եկեղեցին Նախ՝ Բանտի, Ապա Մզկիթի Վերածուած է (լուսանկարներ)

Օսմանեան մեծանուն հայ ճարտարապետ Սարգիս Պալեանի նախագծումով կառուցուած Այնթապի Սուրբ Աստուածածին եկեղեցին ժամանակին եղած է կայսրութեան ամենամեծ եկեղեցիներէն մէկը։ Այս մասին կը հաղորդէ Ermenihaber.am-ը՝ վկայակոչելով Gzt.com-ը։

1892թ. կառուցուած եկեղեցին մինչեւ 1915թ. ծառայած է Այնթապի հոծ հայ բնակչութեան: Հայոց Ցեղասպանութենէն եւ Թուրքիոյ Հանրապետութեան հիմնադրումէն ետք՝ եկեղեցին յանձնուած է երկրի արդարադատութեան նախարարութեան վերահսկողութեան։

1930-1980-ականներուն եկեղեցին մօտ 50 տարի օգտագործուած է իբրեւ բանտ։ Այդ տարիներուն եկեղեցւոյ պատուհաններուն ամրացուած են ճաղավանդակներ։

1980-1985թթ. երբեմնի Սուրբ Աստուածածինը վերածուած է մզկիթի։ Եկեղեցւոյ տրուած է «Քուրթուլուշ» (Փրկութիւն) մզկիթ անուանումը, հարեւանութեամբ կառուցուած է մինարէ, իսկ ներսը՝ միհրապ։

Մինարէ – աշտարակ, ուրկէ կը հնչէ իսլամներուն աղօթականչը։

Միհրապ – աղօթքի համար առանձնացուած որմնախորշ։

Մզկիթի վերածուած հայկական եկեղեցւոյ ներկայ տեսքը կը ներկայացուի լուսանկարներով։