Կեանքը Շարունակելու Պատգամ. 44-օրեայ Պատերազմէն Ետք Առաջին Անգամ Արցախի Դրամատիկական Թատրոնը Հանդէս Պիտի Գայ Պեռլինի եւ Քէոլնի Մէջ
Ստեփանակերտի Վահրամ Փափազեանի անուան դրամատիկական թատրոնը՝ 13 հոգիէ բաղկացած դերասանական կազմով՝ Յունիս 24-ին, Քէոլնի մէջ, եւ Յունիս 26-ին, Պեռլինի մէջ հանդէս պիտի գայ «Երկնքից երեք խնձոր ընկաւ» ներկայացումով: Այս մասին, ըստ 168.am–ի, յայտնած են Գերմանահայոց Կեդրոնական խորհուրդէն:
Վահրամ Փափազեանի անուան դրամատիկական թատրոնը հիմնադրուած է 1932 թուականին, այս տարի կը նշէ 90-ամեակը: Դեռ 2020-ի Օգոստոսին բեմադրուած էր Նարինէ Աբգարեանի «Երկնքից երեք խնձոր ընկաւ» վէպի հիման վրայ ներկայացումը, սակայն վրայ հասած 44-օրեայ պատերազմէն ետք՝ թատրոնի աշխատանքը կանգ առած էր: «Երկնքից երեք խնձոր ընկաւ» ներկայացումը, կարելի է ըսել, թատրոնի վերածնունդն է: Անիկա բեմադրած է Նիւ Եորք բնակող բեմադրիչ եւ դերասանուհի Կարինէ Քոչարեանը:
Ներկայացման լեզուն հայերէն է՝ անգլերէն ենթագրերով:
Ներկայացումը սարերու մէջ ծուարած դատարկուող գիւղի մասին է, որ ընդամէնը ունի 30 տարեց բնակիչ: Տեսած են երաշտ, սով, երկրաշարժ: 58-ամեայ կինը կ՝ընդունի գիւղի դարբինի ամուսնութեան առաջարկը: Այրին, որ առանց զաւակի ապրած էր առաջին դաժան ամուսնութիւնը, պէտք է որոշէ՝ շարունակե՞լ կեանքը դարբինի հետ, թէ՝ ոչ: Ի վերջոյ, այրին կ՝ընդունի առաջարկը եւ գիւղին մէջ նոր կեանք կը ծնի:
Ներկայացումը կեանքը շարունակելու խորհուրդ ու պատգամ ունի:
Բեմադրող Կարինէ Քոչարեանը լրատուամիջոցներու հետ զրոյցի մը ընթացքին ըսած է, որ բեմադրութեամբ փորձած է ըլլալ այն արցախցիի մէկ մասը, որ կը պահէ հողը:
Նշենք, որ Գերմանահայոց Կեդրոնական խորհուրդէն յայտնած են նաեւ, որ դպրոցականներու, ուսանողներու, թոշակառուներու համար տոմսին արժէքը 25 եւրօ է, մինչեւ 12 տարեկան երեխաներուն համար՝ 10 եւրօ, միւսներուն համար արժէքը 30 եւրօ է: