Արցախի Նախագահը Ռազմական Դրութիւն եւ Համատարած Զօրահաւաք Յայտարարած Է
Արցախի Հանրապետութեան նախագահ Արայիկ Յարութիւնեան Արցախի խորհրդարանի արտահերթ նիստին ընթացքին հանդէս եկած է յատուկ ուղերձով, որուն ընթացքին յայտարարած է ռազմական դրութիւն եւ համատարած զօրահաւաք տասնութէն բարձր տարիքային խումբի համար: Արայիկ Յարութիւնեան այս մասին գրած է Facebook-ի իր էջին վրայ:
«Մեկնելով ստեղծուած իրավիճակէն՝ հրաւիրուած է Ազգային ժողովի արտահերթ նիստ: Հանդէս գալով պատգամաւորներուն առջեւ՝ յայտարարած եմ ռազմական դրութիւն եւ համատարած զօրահաւաք տասնութէն բարձր տարիքային խումբի համար:
Մենք բազմիցս յայտարարած ենք, որ պատերազմի կողմնակից չենք, բայց պատրաստ ենք պատերազմի:
Մեզմէ աւելի շատ խաղաղութիւն սիրող ու խաղաղութեան կողմնակից չկայ:
Մենք չենք ուզած պատերազմ, այս պատերազմը մեզի պարտադրուած է, եւ պարտաւոր ենք պաշտպանելու մեր հայրենիքն ու ընտանիքները:
Իրավիճակի սրման համար ամբողջ պատասխանատւութիւնը պիտի կրէ Ազրպէյճանի ռազմաքաղաքական իշխանութիւնը:
Տարածաշրջանին մէջ յղի մարդկային աղետին համար պատասխան պիտի տայ անձամբ Ազրպէյճանի նախագահ Ալիեւը»,- գրած է Յարութիւնեան: