Իսլամացուած Հայերու Մասին Պատմող Վաւերագրական Ֆիլմին Շնորհանդէսը՝ Պոլսոյ Մէջ
Տիարպեքիրի Էղիլ շրջանի իսլամացած հայերուն մասին պատմող վաւերագրական ֆիլմը Պոլսոյ մէջ առաջին անգամ պիտի ցուցադրուի Օգոստոս 4-ին, «Ճեզայիր» սրահին մէջ: Այս մասին կը հաղորդէ Ermenihaber.am-ը՝ վկայակոչելով Gazetekarinca.com-ը։
Ֆիլմին ցուցադրութեան ունկնդիրները հնարաւորութիւն պիտի ունենան կարճ զրոյց ունենալու ֆիլմի բեմադրիչներուն հետ:
Նշենք, որ «Թաքցուած խաչ» վաւերագրական ֆիլմին շնորհանդէսը տեղի ունեցած էր Յունիսին, Տիարպեքիրի քաղաքապետարանի մշակոյթի կեդրոնին մէջ:
Ֆիլմին մասին
«Թաքցուած խաչ» վերնագիրով ֆիլմը կը պատմէ 1915-ին ու անկէ ետք Էղիլի մէջ ապրած հայերու ճակատագիրին մասին՝ աւելի շատ կեդրոնանալով իսլամացուած հայերու ինքնութեան ճգնաժամին, ցեղասպանութենէն ետք անոնց կրած հոգեկան խնդիրներուն եւ իրենց սերունդներուն պատմած պատմութիւններուն վրայ:
«Թաքցուած խաչ»-ի բեմադրիչներն են լրագրողներ Ալթան Սանճարն ու Սերհաթ Թեմելը: Ֆիլմի նկարահանումներուն ծիրէն ներս՝ հեղինակները հանդիպած ու խօսած են իսլամացուած հայերու 1-ին սերունդը համարուող 75-էն բարձր տարիքի մարդոց, ինչպէս նաեւ անոնց հարազատներուն հետ: Հեղինակները պատմութիւնները լսած են նաեւ իսլամացուած հայերու 2-րդ սերունդէն, որոնց տարիքային խումբը 40-էն բարձր է:
Ֆիլմին երաժշտութեան հեղինակն է արուեստագէտ Սասա Սերափը: