Մինսքի Խումի Համանախագահները Կողմերուն Կոչ Կ՛ուղղեն` Մարդասիրական Լրացուցիչ Շօշափելի Ջանքեր Գործադրելու

ԵԱՀԿ Մինսքի խումբի համանախագահներ Իկոր Փոփով (Ռուսիա), Սթեֆան Վիսքոնթի (Ֆրանսա) եւ Էնտրիւ Շեֆըր (Միացեալ Նահանգներ) 27-28 Յունիսին այցելած են Վիեննա եւ Պրաթիսլաւա ԵԱՀԿ-ի Մինսքի խումբի մնայուն ներկայացուցիչներուն` ԵԱՀԿ-ի ընդհանուր քարտուղար Թոմաս Կրեմինկըրին եւ ԵԱՀԿ-ի նախագահող Սլովաքիոյ արտաքին գործոց նախարար Միրոսլաւ Լայչաքին ներկայացնելու իրենց շրջան վերջին այցելութեան եւ Հայաստանի ու Ատրպէյճանի արտաքին գործոց նախարարներուն հետ Մոսկուայի եւ Ուաշինկթընի մէջ իրենց ունեցած խորհրդակցութիւններուն արդիւնքները:

Անոնք նաեւ հանդիպում ունեցած են ԵԱՀԿ-ի բարձր մակարդակի ծրագրաւորման խումբի ղեկավար Վլատիմիր Մինարիքի հետ: Հանդիպումներուն մասնակցած է նաեւ ԵԱՀԿ-ի գործող նախագահի մնայուն ներկայացուցիչ Անճէյ Գասփրչիքը:

Համանախագահները ողջունած են 28 Յունիսին բանտարկեալներու միաժամանակեայ ազատ արձակումը եւ բարձր գնահատած Միջազգային կարմիր խաչի` ձերբակալուածներուն նկատմամբ առաջին դրական քայլին աջակցելու ջանքերը:

Համանախագահները կողմերուն կոչ ուղղած են լրացուցիչ շօշափելի մարդասիրական ջանքեր գործադրելու` որքան կարելի է շուտ բովանդակային բանակցութիւններու համար բարենպաստ մթնոլորտի յետագայ ամրապնդման համար: