ՀՀ ՊՆ-ն Պայմանագիրներ Կնքած է Յարձակողական Նոր Զինատեսակներու Գնելու Վերաբերեալ
Մոսկուայի մէջ տեղի ունեցող «Բանակ 2019» միջազգային ցուցահանդէսի ծիրէն ներս կնքուած են պայմանագիրներ` յարձակողական նոր զինատեսակներ, նոր սերունդի զինամթերք ձեռքբերելու, ինչպէս նաեւ այլ միջոցներ մատակարարելու վերաբերեալ: «Արմենփրես»-ի հաղորդմամբ` «Առաջին ալիք»-ի հետ զրոյցի ընթացքին ՀՀ պաշտպանութեան նախարար Դաւիթ Տօնոյեան նշած է, որ Հայաստանի ռազմական օդուժը վերազինման փուլի մէջ է: Այդ նպատակով ռազմական սարքերու ցուցահանդէսին երկկողմ հանդիպումներ կ՛ունենայ շարք մը ընկերութիւններու ղեկավարներու հետ:
«Այդ պայմանագիրները շատ կարեւոր են մեր զինուած ուժերու զարգացման շարունակականութիւնը ապահովելու համար»,-ըսած է Տօնոյեան: Մատակարարումներ պիտի սկսին այս տարուան վերջը կամ 2020 թուականի սկիզբը: Սպառազինութիւններ ձեռք բերելու բանակցութիւնները կը շարունակուին:
Դաւիթ Տօնոյեան անդրադարձած է նաեւ Ատրպէյճանի պաշտպանութեան նախարարին` հայկական ռազմական օդուժի Կովկասի մէջ կիրառելիութիւնը թերագնահատելուն: «Եթէ աւելի ուշադիր ըլլան, ապա կը նկատեն, որ նոյն բազմագործառոյթ ռազմական օդուժը կ՛օգտագործուի Հիմալայներու` աւելի բարձրադիր գօտիներու մէջ»,-ըսած է Պաշտպանութեան նախարարը:
«Բանակ 2019» միջազգային ցուցահանդէսին կը մասնակցի մօտ 100 օտարերկրեայ պատուիրակութիւն, Հայաստանի ռազմաարդիւնաբերական համալիրը տեղակայուած է առանձին տաղաւարի մէջ: