Առաջին Եռամսեակին Հարկային Եկամուտները Աճած Են 24 Տոկոսով
Հայաստանի Պետական եկամուտներու վարչութեան նախագահ Դաւիթ Անանեան Ապրիլ 3-ին, լրագրողներու յայտնեց, որ 2018-ի առաջին երեք ամիսներուն, պետական եկամուտները եղած էին 239.2 միլիառ դրամ, իսկ 2019-ի առաջին եռամսեակի հարկային եկամուտները 2018-ի նոյն ժամանակահատուածին հետ համեմատած՝ աճած են 24 տոկոսով. ընթացիկ տարուան Յունուարէն Մարտ ամիսներուն հաւաքուած հարկերը կազմած են 296.5 միլիառ դրամ:
2019-ի առաջին եռամսեակին, պիւտճէի հաւաքագրումը 11.4 միլիառ դրամով աճած է: Ըստ Անանեանի՝ այս ժամանակահատուածին փաստացի հաւաքագրուած է 296.5 միլիառ դրամ, նախատեսուած 285.1 միլիառ դրամի փոխարէն: Հարկային մարմինները հաւաքագրած են 226.2 միլիառ դրամ, որ նախորդ տարուան հետ համեմատած՝ 32.3 տոկոսով աւելի է: Մաքսային մարմինները հաւաքագրած են 70.3 միլիառ դրամ. նախորդ տարուան հետ համեմատած աճը կազմած է 4.1 տոկոս: 2019-ի ընթացքին նախատեսուած է հաւաքագրել 1 եռիլիոն 401 միլիառ 875.6 միլիոն դրամ:
Անանեան վստահեցուցած է, որ 2019-ի Յունուարէն Մարտ ամիսներուն 55.5 միլիառ դրամ աւելի հաւաքագրուած հարկային մուտքերը տնտեսական աճի շնորհիւ չէին:
«Տնտեսական աճը այդքան չէ, որ ապահովէր այս բացառիկ աճը: Ասիկա համատեղ աշխատանքի արդիւնք է՝ ստուերի կրճատման ուղղութեամբ: 55 միլիառը հիմնականօրէն ստուերի հաշուին կատարուած է , քան տնտեսական աճի», շեշտած է Անանեան: