Գերիներու Վերադարձի Պահանջով Երեւանի եւ Գիւմրիի Մէջ՝ Հաւաքներ

Մայիս 4-ին Կարէն Դեմիրճեանի արձանին մօտ՝ Մարզահամերգային համալիրի տարածքին, կը նախատեսուի հաւաք՝ ի պաշտպանութիւն հայ գերիներու, արցախահայերու վերադարձի իրաւունքի։ Այս մասին, ըստ «Փաստինֆո»-ի, յայտնած է հասարակական գործիչ Սաիդա Պօղոսեանը։

Ան նշած է, որ հաւաքին պիտի մասնակցին անհետ կորածներու հարազատներ, գերիներու հարազատներ, մարդիկ, որոնք կը պահանջեն իրենց հարազատներու արտաշիրիմում, ինչպէս նաեւ բազմաթիւ արցախցիներ, հասարակական կազմակերպութիւններու եւ տարբեր կուսակցութիւններու ներկայացուցիչներ։

Պօղոսեանի խօսքով՝ կը գործէ «Յանուն ժողովրդական արժէքներու» նախաձեռնութիւնը, որ ձեւաւորած է Մայիս 4-ին եւ 5-ին կայանալիք գագաթնաժողովին զուգահեռ օրակարգ։ Նախաձեռնութեան կ՝աջակցին բազմաթիւ կազմակերպութիւններ։ Անոր խօսքով՝ այդ նախաձեռնութեան անունով պատրաստուած են նամակներ, որոնք կը նախատեսուի փոխանցել ԵՄ ղեկավարներուն։

Արդէն յայտնի է, որ Մայիս 4-ին եւ 5-ին Հայաստանի մէջ պիտի կայանայ Հայաստան-ԵՄ գագաթնաժողովը, որուն պիտի մասնակցին ԵՄ երկիրներու ղեկավարներ։

«Մի քանի ակցիաներ (ցոյցեր) ենք պլանաւորում (ծրագրաւորել), սակայն մի մեծ խնդիր կայ․ Հայաստան-ԵՄ գագաթնաժողովի օրակարգը ոչ մի կերպ չի տրամադրւում, անգամ լրագրողներին։ Դա մեծ խնդիր է, բայց միեւնոյն է ծրագրում ենք մի քանի ակցիա՝ բարձրացնելու բոլոր չլուծուած իրաւունքների հարցերը, նաեւ ակցիա իրականացնել Գիւմրիում։ Մեզ պէտք էր յստակ իմանալ, որ Էմանուէլ Մաքրոնը գնալու է Գիւմրի»,- ըսած է Սաիդա Պօղոսեանը։