ԱՄՆ Քոնկրեսականները Կը Պահանջեն Դադրեցնել ԱԹՍ-ներու Արտահանման Արտօնութիւնը Թուրքիոյ
Ամերիկացի 27 քոնկրեսական Պետական քարտուղար Էնթընի Պլինքընին նամակ յղած է, ուր կոչ կ՝ընէ արգելք կիրառելու Թուրքիոյ նկատմամբ, նշելով, որ «Թրքական ԱԹՍ-ները վտանգ կը ներկայացնեն ԱՄՆ-ի, անոր դաշնակիցներուն համար»։ Այս մասին ԵՌԱԳՈՅՆ-ը կը տեղեկանայ Ermenihaber.am-էն։
27 քոնկրեսական ԱՄՆ-ի պետական քարտուղարին կոչ ըրած է դադրեցնելու անօդաչու թռչող սարքերու՝ Թուրքիա արտահանման արտօնագրերու տրամադրումը, մինչեւ չաւարտի Կովկասի, Հարաւային Ասիոյ, Արեւելեան Միջերկրական ծովու եւ ամբողջ աշխարհի մէջ թրքական անօդաչու սարքերու ծրագրերու ապակայունացնող դերին պաշտօնական հետաքննութիւնը:
Նամակին մէջ յիշատակուած է, որ Թուրքիան խախտած է ՆԱԹՕ-ի դրոյթները, գնելով ռուսական S-400 զենիթահրթիռային ՀՕՊ համակարգեր Ռուսիայէն։ Քոնկրեսականները նշած են, որ Թուրքիոյ նկատմամբ ռուսական համակարգերու պատճառով սահմանուեցան պատժամիջոցներ եւ հակառակ անոր, Անգարան կը շարունակէ մնալ ՆԱԹՕ-ի կազմին մէջ։