«Իրանը Չ՛ընդունիր Ահաբեկիչներու Ոճով Մարդոց Գլխատումը»․ Իրանի ԱԳՆ Խօսնակը` ԼՂ Հակամարտութեան Գօտիէն Հրապարակուած «Անհանգստութիւն Յառաջացնող» Լուսանկարներու Մասին
Իրանի ԱԳՆ պաշտօնական ներկայացուցիչ Սայիտ Ղաթիբզատէ անդրադարձած է Լեռնային Ղարաբաղի հակամարտութեան գօտիէն հրապարակուած «անհանգստացնող» լուսանկարներուն` յայտարարելով, որ Իրանը չ՛ընդունիր մարդոց ահաբեկիչներու ոճով գլխատումը, ինչպէս նաեւ քաղաքներու եւ անմեղ բնակիչներու ուղղութեամբ հարուածները:
Ղաթիբզատէ նշած է,
որ Իրանը չի հանդուրժեր թաքֆիր-ահաբեկիչներուն («Ալ Թաքֆիր ուալ-հիճրա» ծայրահեղական
կազմակերպութիւն) բնորոշ չարագործութիւնները, մարդոց գլխատում կամ յարձակումներ
քաղաքներու եւ անմեղ մարդոց վրայ, կը փոխանցէ Tert.am-ը:
Ան հակամարտութեան երկու կողմերուն «կոչ ըրած է պահպանել միջազգային կանոնները»:
Աւելի առաջ ՀՀ մարդու իրաւունքներու պաշտպան Արման Թաթոյան տեղեկացուցած
էր, որ Ազրպէյճանի զինուորականները քանի մը օր առաջ հայ զինծառայող մը գլխատած են: Հոկտեմբեր
16-ին` ժամը 13-ի մօտ Ազրպէյճանի զինուած ուժերու զինուորական մը զանգահարած է հայ
զինծառայողի հարազատ եղբօրը եւ տեղեկացուցած, որ անոր եղբայրը կը գտնուի իրենց մօտ,
իրենք կոտրած են եղբօր գլուխը, իսկ լուսանկարը պիտի տեղադրեն համացանցին վրայ: Ատկէ
ետք` զանգէն քանի մը ժամ անց սպաննուած զինծառայողին լուսանկարը եղբայրը յայտնաբերած
է անոր սոցիալական ցանցի էջին վրայ: Կայ վարկած, որ նոյն ազրպէյճանցի զինուորականներն
ալ նկարը ընկերային ցանցի էջին վրայ տեղադրած են սպաննելէն ետք: