Արցախը Պատրաստ է ConiFA-ի Եւրոպայի Ախոյեանութեան Կազմակերպման. Նախարար
ConiFA-ի (Անկախ ֆութպոլային միութիւններու ընկերակցութիւն) Եւրոպայի ախոյեանութեան մասնակից Արցախի ֆութպոլի հաւաքականէն մենք ունինք մեծ ակնկալիքներ:
Այս մասին «Արցախփրես»-ի թղթակիցին հետ զրոյցի ընթացքին ըսած է Արցախի կրթութեան, գիտութեան եւ մարմնամարզութեան նախարար Նարինէ Աղաբալեան:
Ըստ անոր` շատ կարեւոր է նաեւ խումբի անդամներուն խաղերէն առաջ ոգեւորելը:
«Վստահ եմ, որ այսօր` Մայիս 29-ին, Արցախի նախագահին հետ հանդիպումը աւելի պիտի քաջալերէ Արցախի ֆութպոլի հաւաքականի անդամները` արժանապատւութեամբ հանդէս գալու ախոյեանութեան»,- նշած է նախարարը:
Խօսելով ախոյեանութեան նախապատրաստական աշխատանքներուն մասին` Աղաբալեան ըսած է, որ գործերը գրեթէ աւարտած են, եւ վաղուընէ իրենք կը սպասեն ConiFA-ի ներկայացուցիչներուն եւ հիւրերուն Արցախի մէջ ընդունելու: Ախոյեանութեան հանդէս պիտի գան 8 խումբ․ ատիկա կը համապատասխանէ ConiFA-ի ձեւաչափերուն: Խումբերը պիտի մրցին 4 մարզադաշտերու մէջ` Ստեփանակերտի, Ասկերանի, Մարտունու եւ Մարտակերտի: Յունիս 1-ին` ժամը 20:00-ին, Ստեփանակերտի Ստեփան Շահումեանի անուան մարզադաշտին մէջ տեղի պիտի ունենայ ConiFA-ի առաջնութեան բացման հանդիսաւոր արարողութիւնը:
«Ախոյեանութեան մուտքը ազատ է: Մենք ամէն ինչ պիտի ընենք, որ իւրաքանչիւր ոք հնարաւորութիւն ունենայ ներկայ գտնուելու խաղերուն բացումին: Վստահ եմ, որ ոչ միայն ֆութպոլասէրներու, այլեւ բոլորի համար պիտի կարենանք ապահովել տօնական տրամադրութիւն: Այս առաջնութիւնը մեծապէս պիտի խթանէ ե՛ւ ֆութպոլի զարգացման, ե՛ւ Արցախի ճանաչման, ե՛ւ թէ մեր հայրենիքի հզօրացման: Քանի որ այս առաջնութիւնը նախադէպ է մեզի համար, մենք հնարաւորինս պատրաստուած ենք բարձր մակարդակով: Անիկա նաեւ մեզի համար իւրօրինակ փորձառութիւն պիտի ըլլայ` յետագային նման նախաձեռնութիւններ կազմակերպելու համար»,- աւելցուցած է ան։
Անդրադառնալով ախոյեանութեան ֆինանսաւորման ՝ Աղաբալեան նշած է, որ ատիկա կ՛իրականացուի պետական ամավարկի եւ հովանաւորներու աջակցութեամբ: Հովանաւորներէն մասնաւորապէս նախարարը յիշած է ամերիկահայ բարերար Ալպերթ Պոյաճեանը, որ 1 միլիոն տոլար տրամադրած է Արցախի 4 մարզադաշտերու վերանորոգման:
Նախարարը նշած է նաեւ, որ իրենք շարունակաբար կը ստանան օգնութիւն:
Այն հարցումին, թէ Ատրպէյճան ինչպէս կը վերաբերի Արցախի մէջ ConiFA-ի ախոյեանութեան իրականացման՝ նախարարը մասնավարապէս պատասխանած է. «Ես կողմնակից եմ, որ մենք մեր որեւէ նախաձեռնութիւն չկապենք Ատրպէյճանի արձագանգներուն հետ: Այս տարիներու ընթացքին մենք երբեք կանգ չենք առած, եւ չենք մտածեր Ատրպէյճանի արձագանքներուն մասին: Մենք ամէն ինչ կ՛ընենք խաղաղութիւնը աւելի կայուն դարձնելու համար, կը զարգացնենք մշակոյթը, մարմնամարզութիւնը եւ հանդէս կու գանք խաղարար նախաձեռնութիւններով: Եթե նոյնիսկ կա յ իրենց կողմէ բացասական արձագանգներ, ատիկա միայն կը խօսի իրենց անհանդուրժողականութեան մասին»: