Փայլան` Էրտողանին. «104 Տարի Անցաւ, Բայց Մտածելակերպը Նոյնն է»
Թուրքիոյ քրտամէտ «Ժողովուրդներու ժողովրդավարական կուսակցութեան» հայ պատգամաւոր Կարօ Փայլան անդրադարձած է Ապրիլ 24-ին Թուրքիոյ նախագահ Ռեճեփ Թայիփ Էրտողանի յայտարարութեան, ուր ան նշած էր, թէ հայերու աքսորը 1915-ին ամենաողջամիտ քայլը կրնար ըլլալ:
«էրմենիհապեր»-ի փոխանցմամբ, Փայլան Twitter-ի իր էջին վրայ երկու գրառում ըրած է, որոնցմէ մէկը կը վերաբերուի Ապրիլ 24-ին Էրտողանի ցաւակցական ուղերձին:
Առաջին գրառման մէջ մասնաւորապէս ըսուած է.
«Նախագահ Էրտողան Ապրիլ 24-ի տարելիցին նախագահականին մէջ ունեցած էլոյթի ժամանակ ըսած է, որ աքսորը այդ ժամանակաշրջանին ամենաողջամիտ քայլը կրնար ըլլալ: Ան Թալէաթի, Էնվէրի, Ճեմալի ռազմական խորհուրդին կողմէ հայ ժողովուրդին դէմ կիրառուած քաղաքականութեան տէր կանգնեցաւ: 104 տարի անցաւ, սակայն ցաւօք մտածելակերպը նոյնն է»:
Միւս գրառման մէջ Փայլանը նշած է.
«Էրտողան երէկ հրապարակած ցաւակցական ուղերձին մէջ ըսած է. «Այս տարի ալ կը յարգեմ առաջին համաշխարհային պատերազմի պայմաններուն մէջ մահացած օսմանցի հայերուն յիշատակը»: Այս յայտարարութեան մէջ ոճրագործ չկայ: Հայ ժողովուրդը ոչնչացուած է պետութեան որոշումով: Այն ցաւակցութիւնը, որ չի բանար արդարութեան ճանապարհը, վէրքին դարման չ՛ըլլար»: