2018-ին Հայաստան Ժամանածներուն Թիւը Մեկնածներէն 15 Հազարով Աւելի է
Լիլիթ Աբովեան
2018-ին Հայաստան ժամանումներու եւ Հայաստանէն մեկնումներու հաշուեկշիռը դրական է․ Ազգային վիճակագրական կոմիտէն հրապարակած է 2018-ին Հայաստանի ժողովրդագրական պատկերի վիճակագրութիւնը:
Ըստ անոր` 2018-ին դէպի Հայաստան ժամանումները կազմած են 3,8 միլիոն (3 757 168), մեկնումները` 3,7 միլիոն (3 741 855), հաշուեկշիռը դրական է` 15 313:
Ըստ փոխադրամիջոցներու տեսակին` օդային եւ երկաթուղային միջոցներով փոխադրումներու հաշուեկշիռը դրական է, իսկ ինքնաշարժներունը` բացասական` -39 068:
Երբ կ՛ուսումնասիրենք վերջին հինգ տարիներու տուեալները, պարզ կը դառնայ, որ օդային ճանապարհով փոխադրումները բացասական եղած են միայն 2015-ին, իսկ ինքնաշարժի ուղեւորահոսքը բոլոր տարիներուն բացասական է` ամենաբարձր բացասական հաշուեկշիռը եղած 2016-ին ` -57 866 մարդ:
Դրական հաշուեկշիռի մասին
Հակառակ մեկնածներու ու ժամանածներու տարբերութիւնը դրական է, ՀՀ փաստաթուղթերով (անձնագիրներով) մեկնումներու ու ժամանումներու տարբերութիւնը կը շարունակէ բացասական մնալ` թէեւ բաւական նուազած է: Այսպէս, եթէ 2017-ին հայաստանեան փաստաթուղթերով սահմանային անցակէտերով տեղի ունեցած մուտքերու եւ ելքերու տարբերութիւնը կազմած է -36 191, ապա արդէն 2018-ին` -4 588 է:
Հայաստան 2018-ին նաեւ ամենաշատ կացութեան կարգավիճակ տրամադրած է օտարերկրացիներուն 2015-էն ի վեր (ցուցանիշը կը հաշուի 2015-էն): 2018-ին 7 145 մարդ Հայաստանի մէջ կացութեան կարգավիճակ ստացած է, որոնց 1 710-ը` մշտական: 2015-ին, օրինակ, կացութեան կարգավիճակ ստացած է 5 722 մարդ, որոնցմէ 1 185-ը` մշտական: 2018-ին Հայաստանի մէջ ամենաշատ կացութեան կարգավիճակ ստացած են Հնդկաստանի քաղաքացիները` 1 907 մարդ, Ռուսիոյ` 1 135, Իրանի` 1 130 քաղաքացիները:
Կացութեան մշտական կարգավիճակ, ինչպէս նախորդ տարիներուն, ամենաշատը ստացած են Ռուսիոյ քաղաքացիները: