Սերժ եւ Անժէլա Թանկեանները Աջակցած են Հայաստանի 200 Անապահով Ընտանիքի
Աշխարհահռչակ ռոք երաժիշտ Սերժ Թանկեանը՝ տիկնոջ Անժէլա Թանկեանի հետ, օգնած են Հայաստանի տարբեր բնակավայրերու աւելի քան 200 անապահով ընտանիքի: Այս մասին կը հաղորդէ Armenpress.am-ը՝ ներկայացնելով այս առնչութեամբ տրամադրուած հաղորդագրութիւնը ամբողջութեամբ.
«Արդէն քանիերորդ տարին է` Սերժ եւ Անժէլա Թանկեանները՝ «Օրրան» բարեգործական հասարակական կազմակերպութեան գլխաւորութեամբ եւ «Դասաւանդի́ր, Հայաստան» հիմնադրամի, «Կանանց ռեսուրսային կենտրոն» եւ «Բարի մամա» ՀԿ-ներու հետ համատեղ՝ կ՝իրականացնեն բարեգործական ծրագիրներ` ուղղուած Հայաստանի մէջ աղքատութեան յաղթահարման:
Հերթական բարեգործութիւնը իրականացուեցաւ 2018-2019-ի ձմրան, որուն ծիրէն ներս՝ Հայաստանի Հանրապետութեան Գեղարքունիքի, Լոռիի, Շիրակի, Արագածոտնի, Արմաւիրի, Արարատի, Վայոց Ձորի, Սիւնիքի, Կոտայքի մարզերու եւ Երեւանի` աւելի քան 200 անապահով ընտանիքներ ներառուեցան սննդամթերքով ապահովման եռամսեայ ծրագիրին:
Թանկեան ընտանիքը տարիներ շարունակ եղած է այն հայ ընտանիքներու կողքին, որոնք տարբեր պատճառներով յայտնուած են դժուար իրավիճակի մէջ, անգնահատելի եւ երախտագիտութեան արժանի աջակցութիւն ցուցաբերելով անոնց»: