Հոկտեմբեր 16-ին Կառավարութիւնը Արտահերթ Նիստ Պիտի Գումարէ. Կ՛ակնկալուի` Փաշինեան Հրաժարական Տայ

Հոկտեմբեր 16-ին` ժամը 11:00-ին, տեղի պիտի ունենայ ՀՀ կառավարութեան արտահերթ նիստ, կը յայտնէ գործադիրի մամլոյ ծառայութիւնը:

Ըստ “ՓանԱրմիիըն”-ի՝ օրեր առաջ ՀՀ վարչապետ Նիկոլ Փաշինեան France 24-ին տուած հարցազրոյցի ընթացքին յայտարարած էր, որ Դեկտեմբերին արտահերթ խորհրդարանական ընտրութիւններ իրականացնելու նպատակով մտադիր է հրաժարական տալ: Ան մասնաւորապէս նշած էլ, որ հրաժարական պիտի տայ Հոկտեմբեր16-ին, եւ ըստ մօտաւոր հաշուարկներու ընտրութիւնները տեղի պիտի ունենան Դեկտեմբեր 9-ին:

Յիշեցնենք, որ Փաշինեան ԱԺ «Ծառուկեան» խմբակցութեան ղեկավար Գագիկ Ծառուկեանի հետ ստորագրած է յուշագիր , որով վերջինիս գլխաւորած խմբակցութիւնը կը պարտաւորուի իր հրաժարականէն ետք չառաջադրել ՀՀ վարչապետի թեկնածու, երկու անգամ անընդմէջ դէմ քուէարկել որեւէ այլ ուժի կողմէ ներկայացուած թեկնածուին, որմէ ետք Ազգային ժողովը կը լուծարուի օրէնքի ուժով:

ԱԺ արտահերթ ընտրութիւնները Դեկտեմբերին իրականացնելու եւ վարչապետի թեկնածու չառաջադրելու մասին յայտարարած են նաեւ «Հանրապետական» խմբակցութեան եւ զայն վերջերս լքած աւելի քան քսան պատագամաւոր: