Լեւոն Հայրապետեանը Զանգահարած եւ Յայտնած էր Զինք Թունաւորելու Կասկածներուն Մասին. Պարգեւ Սրբազան
Ռուսական «Կոմերսանտ» թերթին համաձայն՝ ՌԴ քննչական կոմիտէն պիտի ուսումնասիրէ գործարար եւ բարերար Լեւոն Հայրապետեանի մահուան թունաւորման վարկածը:
Ըստ աղբիւրին՝ մահանալէն առաջ Հայրապետեանը զինք թունաւորելու մասին տեղեկացուցած էր եղբայրը եւ Արցախի թեմի առաջնորդ Պարգեւ արքեպիսկոպոս Մարտիրոսեանը:
Artsakhpress.am-ի տեղեկութիւններով՝ նշեալ հարցին վերաբերեալ Արցախի թեմի առաջնորդ Պարգեւ արքեպիսկոպոս Մարտիրոսեան ըսած է, որ մահէն առաջ՝ Հոկտեմբեր 17-ի երեկոյեան, Լեւոն Հանյրապետեանը հեռաձայնած է իրեն եւ յայտնած զինք թունաւորելու կասկածներուն մասին:
«Երբ ան հեռաձայնեց ինծի, հազիւ կը խօսէր, ձայնն ալ տեսակ մըն էր: Հարցուցի, թէ ի՞նչ պատահած է, ըսաւ, որ շաքարը իջած է: Այնուհետեւ հարցուցի, թէ ինչպէս կը զգայ, ան ալ ըսաւ, որ կը կասկածի, որ թունաւորած են զինք: Ինծի թուաց, թէ ան պարզապէս յուսալքուած է բանտային կեանքէն, փորձեցի անգամ գօտեպնդել»,- նշած է Պարգեւ Սրբազանը՝ աւելցնելով, որ իրենց խօսակցութենէն ժամեր անց լսուած է մեծ բարերարի մահուան բօթը:
Յիշեցնենք, որ Լեւոն Հայրապետեանը մահացած է 2017 Հոկտեմբեր 18-ին, 68 տարեկանին, Մոսկուայէն 750 քմ հեռու գտնուող Մորտովիայի քրէակատարողական հիմնարկին մէջ: Այդ աիթով՝ Sobesednik.ru-ն գրած էր, որ նախօրէին վատացած էր անոր ինքնազգացողութիւնը, սակայն Հայրապետեանը չեն տեղափոխած հիւանդանոց։