Թուրքիոյ Մէջ Ընթացող Միջազգային Մրցաշարը Հայաստանի Բռնցքամարտիկները Յաղթանակով Սկսած են

Բռնցքամարտի Հայաստանի հաւաքականի անդամները սկսած են պայքարը Թուրքիոյ մէջ իրականացուող միջազգային մրցաշարին:

Ըստ Armenpress.am-ի՝ մարզիկներէն չորսը յաղթանակի հասած են թուրք բռնցքամարտիկներու նկատմամբ, իսկ Յովհաննէս Բաչկովը յաղթած է գանացի մարզիկին: Սեպտեմբեր 13-ին տեղի կ’ունենան քառորդ եզրափակիչի մենամարտերը եւ պայքար կը սկսի նաեւ 52 քկ քաշային Արթուր Յովհաննիսեան, որ նոյնպէս պիտի մրցի թուրք բռնցքամարտիկի հետ:

Սթամպուլի մէջ Հայաստանը կը ներկայացնեն 52 քկ քաշային Արթուր Յովհաննիսեան, 56 քկ քաշային Ժորա Մարգարեան, 64 քկ քաշային Յովհաննէս Բաչկով, 69 քկ քաշային Արսէն Պօղոսեան, 75 քկ քաշային Արման Դարչինեան, 91 քկ քաշային Նարեկ Մանասեան:

Հայ բռնցքամարտիկները մրցավայր մեկնած են մարզիչ Ռուդիկ Մկրտչեանի գլխաւորութեամբ: