Բանակցութիւններու Հոլովոյթին Սպառնալիքի Լեզուն Չի Գործեր. Զօհրապ Մնացականեան
Մալթայի արտաքին գործոց եւ առեւտուրի խթանման նախարար Քարմելօ Ապելայի հետ տուած միացեալ մամլոյ ասուլիսին ընթացքին Հայաստանի արտաքին գործոց նախարար Զոհրապ Մնացականեան` անդրադառնալով Ուաշինկթընի մէջ Ատրպէյճանի արտաքին գործոց նախարար Էլմար Մամետեարովի հետ կայացած հանդիպման մանրամասնութիւններուն` ըսած է, որ Հայաստանի համար չափազանց կարեւոր է ղարաբաղի տագնապի լուծման առումով խաղաղութեան նպաստող միջավայրը:
«Մենք քննարկած ենք բաւական հարցեր, որոնք կառուցուած են այն ամբողջ երկխօսութեան վրայ, որ տեղի ունեցած է մինչեւ ուաշինկթընեան հանդիպումը: Առանձնայատուկ էր այն, որ հանդիպումը տեղի կ՛ունենար այն ատեն, երբ մենք շփման գիծին վրայ ունէինք լարուածութեան որոշ աճ եւ, բնականաբար, ատիկա չէր կրնար իր ազդեցութիւնը չունենալ հանդիպման վրայ: Բնականաբար, բաւական մեծ տեղ յատկացուցինք այդ իրողութեան եւ քննարկեցինք այն բոլոր հարցերը, որոնք անհրաժեշտ են իրավիճակի լարուածութիւնը նուազեցնելու եւ խուսափելու որեւէ յաւելեալ զարգացումէ, որ ա՛լ աւելի պիտի սրէ իրավիճակը»,- յայտնած է Մնացականեան:
Ըստ անոր, կան քանի մը նախաձեռնութիւններ, որոնք ԵԱՀԿ-ի Մինսքի խմբակի համանախագահներուն կողմէ եւս յառաջ բերուած են եւ անոնք պիտի ստեղծեն իրավիճակ մը, որ պիտի նպաստէ խաղաղ հոլովոյթին:
«Խաղաղութեան նպաստող միջավայրը մեզի համար չափազանց կարեւոր ու գերակայ խնդիրներէն մէկն է: Այդ միջավայրը իր մէջ կը ներառէ երկու կարեւոր բաղադրիչ, որոնցմէ մէկը կը վերաբերի մարդկային կապերուն, հռետորաբանութեան նուազեցման եւ այնպիսի միջավայրի, ուր ատելութեան մթնոլորտը զարգացում չստանայ, այլ հակառակը: Անոր միւս բաղադրիչը այն է, որ պէտք է շարունակենք աշխատիլ յարձակումի վտանգներու նուազեցման ուղղութեամբ: Ասիկա այնպիսի համակարգ է, որ իր մէջ կը պարունակէ տարբեր գործառոյթներ: Մենք ունէինք իրավիճակ, որ կը պահպանուէր Տուշանպէի պայմանաւորուածութիւններուն հիման վրայ, եւ ասիկա մեզի համար կը շարունակէ մնալ գերակայ խնդիր»,- դիտել տուած է նախարարը:
Մնացականեան շեշտած է, որ բանակցութիւններու հոլովոյթին մէջ սպառնալիքի լեզուն տեղ չունի, կարելի չէ ըլլալ այնպիսի կացութեան մէջ, երբ բանակցութիւնները պիտի կատարուին սպառնալիքի, վտանգի լոյսին տակ: «Միւս բաղադրիչը, որ նոյնպէս կարեւոր է, Լեռնային Ղարաբաղի մասնակցութեան հարցն է, որովհետեւ Արցախը պէտք է ունենայ եւ ուժեղացնէ սեփականութեան զգացումը բանակցային հոլովոյթին մէջ: Ասիկա նոյնպէս օրակարգային հարց է»,- եզրափակած է Մնացականեան: