Արթուր Ալեքսանեանը Ողիմպիական Խաղերու Եզրափակիչ Հասաւ

Ողիմպիական խաղերու ոսկէ, արծաթէ եւ պրոնզէ մետալակիր, աշխարհի քառակի, Եւրոպայի 7-ակի ախոյեան Արթուր Ալեքսանեանը պիտի պայքարի կրկնակի ողիմպիական ախոյեանի տիտղոսին համար: Այս մասին կը հաղորդէ «ԵՐԿԻՐ»-ը։

Փարիզի մէջ իրականացուող 33-րդ ամառնային Ողիմպիական խաղերու յունահռոմէական ոճի ըմբշամարտի 97 քկ քաշայիններու կիսաեզրափակիչին Արթուր Ալեքսանեանը գօտեմարտեցաւ աշխարհի ախոյեան, Փանամերիկեան խաղերու ախոյեան, Փանամերիկեան առաջնութեան յաղթող, քուպացի Գաբրիէլ Ալեխանտրօ Ռոսիլիօ Գինտելանի հետ եւ յաղթեց 5:3 հաշուով:

Նշենք, որ Արթուր Ալեքսանեանը Լոնտոն-2012-ի պրոնզէ մետալակիր է, Ռիօ-2016-ի ոսկէ եւ Թոքիօ-2020-ի արծաթէ մետալակիր: Փարիզ-2024-ը Ալեքսանեանի չորրորդ Ողիմպիական խաղերն են: