Նոյն Ոգիով Պիտի Շարունակենք Մեր Սուրբ Աթոռին Զօրակցութիւնը Արցախի Հանրապետութեան․ Արամ Ա․ Կաթողիկոս
Արամ Ա. Վեհափառ Հայրապետին Շնորհաւորական Նամակը` Արցախի Հանրապետութեան Նորընտիր Նախագահին
Վսեմաշուք
Տիար Սամուէլ Շահրամանեան
Նորընտիր Նախագահ
Արցախի Հանրապետութեան
Ստեփանակերտ
Սիրելի՛ պրն. նախագահ,
Մեծի Տանն Կիլիկիոյ կաթողիկոսութեան Անթիլիասի մայրավանքէն հայրապետական օրհնութեամբ եւ ջերմ սիրով կ՛ողջունենք Ձեր ընտրութիւնը` իբրեւ նախագահ Արցախի Հանրապետութեան: Այս առիթով ջերմօրէն կը շնորհաւորենք Ձեզ եւ կը մաղթենք, որ Արցախի պատմութեան ճգնաժամային հանգրուանին Ձեր ստանձնած պատասխանատուութիւնը վերանորոգ հաւատքով ու նուիրումով կարենաք լիովին արդարացնել` ի խնդիր Արցախի մեր սիրելի ժողովուրդին ինքնորոշման արդար իրաւունքին:
Արդարեւ, Արցախի հայութեան կեանքի մշուշապատ այս օրերուն, Արցախի ապաշրջափակումը եւ անոր իրաւունքներու տիրացման հետապնդումը հարկ է, որ դառնան առաջնահերթ նպատակը իւրաքանչիւր հայու եւ համայն հայութեան: Մենք անձնապէս, Մեր բոլոր կարելիութիւնները ի գործ դրած ենք ու պիտի շարունակենք դնել միջազգային մակարդակով հետապնդելու Արցախի ժողովուրդին ինքնորոշման իրաւունքը: Մեծի Տանն Կիլիկիոյ կաթողիկոսութիւնը իր թեմերով միշտ եղած է Արցախի պետութեան, անոր քաջարի բանակի ու հերոսական ժողովուրդի կողքին: Կը վստահեցնենք Ձեզ, որ նոյն ոգիով պիտի շարունակենք մեր Սուրբ աթոռին զօրակցութիւնը Արցախի Հանրապետութեան:
Անգամ մը եւս, անձնապէս եւ յանուն մեր Սուրբ աթոռի միաբանութեան, ժողովականութեան, թեմերուն եւ մեր ժողովուրդին ջերմօրէն կը շնորհաւորենք Ձեր ընտրութիւնը: Թող Ամենաբարին Աստուած Իր հովանին անպակաս ընէ Արցախի Հանրապետութեան վրայէն եւ Արցախի հայութեան շնորհէ խաղաղ ու բարօր տարիներ:
Հայրապետական օրհնութեամբ,
Աղօթարար՝
ԱՐԱՄ Ա. ԿԱԹՈՂԻԿՈՍ
ՄԵԾԻ ՏԱՆՆ ԿԻԼԻԿԻՈՅ
Անթիլիաս, 11 Սեպտեմբեր 2023