Լաւրովը ազրպէյճանի ԱԳ Նախարարին Կոչ Ըրած Է Ապաշրջափակելու Լաչինի Միջանցքը
Ռուսիոյ արտաքին գործոց նախարար Սերգեյ Լաւրովը, Յունուար 17-ին, ազրպէյճանի արտաքին գործոց նախարար Ճէյհուն Պայրամովի հետ հեռախօսազրոյցին ընթացքին ընդգծած է Լաչինի միջանցքով երթեւեկութեան արագ ամբողջական ապաշրջափակման անհրաժեշտութիւնը։
«Ռուսական կողմը ընդգծած է Լաչինի միջանցքին երկայնքով երթեւեկութեան շուտափոյթ ամբողջական ապաշրջափակման անհրաժեշտութիւնը՝ 2020 թուականի Նոյեմբեր 9-ի եռակողմ բարձր մակարդակի յայտարարութեան մէջ նշուած կէտերուն համաձայն»,- նշուած է ՌԴ ԱԳՆ յայտարարութեան մէջ։
Ընդգծուած է նաեւ յարակից բոլոր հարցերուն շուրջ փոխադարձ ընդունելի որոշումներու կայացման կարեւորութիւնը՝ Ռուսիոյ, ազրպէյճանի եւ Հայաստանի ղեկավարներու համաձայնութիւններուն հիման վրայ հայ-ազրպէյճանական յարաբերութիւններու կարգաւորման առանցքային ուղիներու վրայ համապարփակ աշխատանքը վերսկսելու համար։
Ռուսիոյ դիւանագիտական առաքելութիւնը նաեւ նշած է, որ նախարարները քննարկած են երկկողմ եւ տարածաշրջանային օրակարգի շարք մը արդիական հարցեր։