Հազուադէպ Հանդիպող Հայկական Ուտեստներ

Այլեւայլ

1. Տաւուշի Բորանի։ Տաւուշի մարզին մէջ լայն տարածում ունեցող ճաշատեսակ է: Տաւուշի Բորանիի hիմնական բաղադրիչներն են հորթի շոգեխաշած միսը՝ համեմուած սեւ սալորաչիրով, շագանակով եւ սոխառածով:

2. Խաշիլ։ Հայաստանի շարք մը մարզերու մէջ տարածում ունեցող ուտեստ է: Խաշիլը կը համարուի հայկական նախաճաշ: Հիմնական բաղադրիչներն են՝ փոխինձը, կաթը կամ չորաթանը, իւղը կամ կարագը, սոխառածը: Որոշ շրջաններու մէջ տարածուած է նաեւ «Եփութուխ» անունով:

3. Խոխոբ։ Հաւու կամ ոչխարի կտրտած միսով, իւղով, սոխով ու նուռի հատիկներով պատրաստուող կերակրատեսակ է: Խոխոբը տարածուած է Արցախի եւ Սիւնիքի մէջ:

4. Վանանուշ։ Վանայ անուշ կերակուր, ասկէ ալ յառաջացած է անունը՝ վանանուշ: Կը պատրաստուի գառնուկի միսով, սեւ սալորաչիրով, տապկուած սոխով եւ կը համեմուի նուռի օշարակով: Կը մատուցուի տաք վիճակով:

5. Ուրմիա։ Արեւելեան Հայաստանի մէջ տարածուած ուտեստ, որ կը պատրաստուի գառնուկի միսով եւ բանջարեղէնով՝ սմբուկ, պղպեղ, լոլիկ, սոխ եւ սխտոր: Ուրմիան մատուցելու ընթացքին կը ձեւաւորեն կանաչեղէնով:

6. Պազրկանի։ Մուսա Լեռի մէջ պազրկանին եղած է հովիւի ճաշին անուանումը: Կան տարբեր տեսակի պազրկանիներ: Մախաղի մէջ եղած է սուրքի (Մուսա Լերան հորած պանիր) կամ ձիթապտուղ. Սարերու վրայ ձիթենիներն ու ընկուզենիները շատ են, հետեւաբար քիչ մը ձիթապտուղ, մէկ գլուխ սոխ, լոլիկի մածուկ, ընկոյզ եւ ձիթաիւղ. ահա եւ հովիւի  համեղ կերակուրը։

7. Այլազան։ Արարատեան խոհանոցի գոհարներէն մէկը այլազանն է: Անիկա հին հայկական ուտեստ է, որուն հիմնական բաղադրիչները սննդարար բանջարեղէններն են՝ ստեպղին, ծաղկակաղամբ, սունկ, պղպեղ՝ համեմուած յատուկ թանձրուկով:

8. Քյէլէկէոշ։ Գարնանամուտի տօնածիսական ճաշատեսակ է՝ Վան-Վասպուրական նահանգի խոհանոցէն։ Քյէլէկէոշը կը պատրաստուի մեծ կաթսայով եւ կը մատուցուի խաշի նման բազմամարդ սեղանի համար. Պնակին մէջ կը լեցնեն չոր լաւաշ, վրան՝ մեծ քանակով խաշած ոսպ, ապա՝ տաք չորաթանը, իսկ
ամենավերջը՝ սոխառածը լեռնային կանաչեղէններու (դաղձ, ուրց, անանուխ) հետ: Հարուստները սոխառածը կը պատրաստէին ղաւուրմայով: