Ջիւան Աւետիսեանի «Դրախտի Դարպասը» Թորոնթոյի Միջազգային Փառատօնին Ճանչցուած է Լաւագոյն Խաղարկային Ֆիլմ

Ֆիլմերու բեմադրիչ Ջիւան Աւետիսեանի «Դրախտի դարպասը» շարժանկարը, որ կ՝անդրադառնայ արցախեան թեմային, Թորոնթոյի Pomegranate միջազգային փառատօնին արժանացած է «Լաւագոյն խաղարկային ֆիլմ» մրցանակին:

Այս մասին Facebook-ի իր էջին վրայ գրած է Ջիւան Աւետիսեանը՝ շնորհակալութիւն յայտնելով իրենց աշխատանքը բարձր գնահատելուն համար: Ան նաեւ շնորհակալութիւն յայտնած է իր խումբին՝ քրտնաջան աշխատանքին համար։

Ֆիլմի անդրանիկ ներկայացումը տեղի ունեցած էր 2019-ին, Երեւանի մէջ:

«Դրախտի դարպասը» Ջիւան Աւետիսեանի արցախեան թեմատիկայով երրորդ ֆիլմն է։ Անիկա ութ երկրի համատեղ արտադրութիւն է՝ Հայաստան, Լիթվիա, Գերմանիա, Ֆրանսա, Պուլկարիա, Չեխիա, Իտալիա, ԱՄՆ։ Ֆիլմի դերասանական կազմին մէջ են Ռիխարտ Զամէլը՝ Գերմանիայէն, Թաթիանա Սբիվագովան՝ Ֆրանսայէն, Լէոնարտաս Բոպետոնոսցեւասը՝ Լիթվիայէն, Նայիրա Զաքարեանը՝ ԱՄՆ-էն, Սօս Ջանիբէկեանը՝ Հայաստանէն եւ այլ սիրուած դերասաններ՝ Հայաստանէն եւ արտերկրէն։ Նկարահանումները իրականացուած են Արցախի եւ Լիթվիայի մէջ։ Ֆիլմը կեանքի կոչուած է Հայաստանի շարժապատկերի ազգային կեդրոնին նիւթական աջակցութեամբ: