«Երգող Արցախ». Շուշիի «Վարանդա»-ն Դարձեալ Բեմի Վրայ է

Այսօր՝ Սեպտեմբեր 2-ին, Ստեփանակերտի Մշակոյթի եւ երիտասարդութեան պալատին մէջ տեղի ունեցած է Շուշիի «Վարանդա» երգչախումբի՝ «Երգող Արցախ» խորագիրը կրող համերգը՝ նուիրուած Արցախի հանրապետութեան հռչակման 30-ամեակին։ Այս մասին ԵՌԱԳՈՅՆ-ը կը տեղեկանայ Artsakhpress.am-էն։

Ձեռնարկը սկսած է «Եկէ՛ք երգենք» ստեղծագործութեամբ։

«Այսօր կոտրուած սրտով, սակայն ձեր նման տոկուն կամքով ձեզի հետ եմ կրկին՝ ձեզի հետ ապրելու, արարելու, ոգեւորուելու, զօրանալու եւ մեր հաւաքական ու աւանդական լաւատեսութիւնը, պայծառամտութիւնը, յոյսն ու հաւատը, կորսնցուցածը ետ բերելու կամքն ու կորովը վերագտնելու։ Մենք պարտաւոր ենք դասեր քաղելու մեր հին ու նոր պատմութենէն, ու, հաւատալով արդարութեան յաղթանակին, եռամիասնաբար կերտելու մեր գալիք սերունդներուն վաղուան օրը։ Մենք պէտք է ապրինք ու արարենք այնպէս, որ թշնամիի աչքին առջեւ վերակառուցենք հզօր ու բարգաւաճ երկիր, որպէսզի մեր բազում նահատակներուն թափած արիւնը անօգուտ վատնուած չըլլայ։ Շնորհաւոր Արցախի հանրապետութեան հռչակման 30-ամյեակը։ Թող արցախցին ապրի խաղաղ ու երջանիկ հայրենիքի մէջ»,- ըսած է «Վարանդա» երգչախումբի գեղարուեստական ղեկավար Զաքար Քեշիշեան՝ զրուցելով Artsakhpress.am-ի լրագրողին հետ։

Ձեռնարկին ընթացքին հնչած են «Բարի օր», «Ցնծա՛, հայոց աշխարհ», «Ժառանգներն ենք Արցախի», «Տղերքը, որոնք չկան», «Բարձրիկ Շուշի», «Իմ ուսուցիչ» երգերը, իսկ վերջին ակորդը տրուած է «Սարդարապատ» երգով։

Ձեռնարկին ներկայ եղած են Արցախի Թեմի Առաջնորդ Վրթանես եպիսկոպոս Աբրահամեանը, ԱՀ ԿԳՄՄ նախարար Լուսինէ Ղարախանեանը, ԱՀ Տարածքային կառավարման եւ ենթակառուցուածքների նախարար Հայկ Խանումեանը, պետական այլ այրեր, զինուորականներ։