Ընկերվար Երիտասարդներու Միջազգային Միութիւնը Խստօրէն Կը Դատապարտէ Ազրպէյճանի Եւ Թուրքիոյ Կողմէ Վերջին Յարձակումը Արցախի Վրայ
Աշխարհի մեծագոյն երիտասարդական-քաղաքական կազմակերպութիւնը` Ընկերվար երիտասարդներու միջազգային միութիւնը, որուն կ՛անդամակցի ՀՅ Դաշնակցութեան երիտասարդականը, յատուկ յայտարարութիւններով խստօրէն դատապարտած է Արցախի վրայ ազրպէյճանական յարձակումը:
«27 սեպտեմբերի կանուխ առաւօտեան Ազրպէյճանը լայնածաւալ ռազմական յարձակումներ իրականացուցած է արցախեան-ազրպէյճանական շփման գօտիին մէջ, ինչպէս նաեւ ուղղակի յարձակումներու ենթարկուած է Ստեփանակերտի եւ այլ քաղաքներու խաղաղ բնակչութիւնը եւս: Ազրպէյճան կ՛իրականացնէ այս գործողութիւնները` ոտնակոխելով Հայաստանի, Արցախի եւ Ազրպէյճանի միջեւ 1994 կնքուած հրադադարը, եւ «Քորոնա» ժահրի համավարակի ընթացքին համընդհանուր հրադադար հաստատելու` ՄԱԿ-ի ընդհանուր քարտուղարութեան վերջին կոչը:
Ամէնէն մտահոգիչ փաստը այն է, որ Թուրքիան լկտիաբար յայտարարած է Ազրպէյճանին իր լայնածաւալ օգնութեան մասին: Թուրքիան, ունենալով մարդու իրաւունքներու խախտումներու երկարատեւ պատմական փորձ, ինչպէս, օրինակ, բռնութիւնները քիւրտերու դէմ, ռազմական ներխուժումները Սուրիա եւ Լիպիա, Յունաստանի եւ Կիպրոսի դէմ եղած սադրանքները, կը շարունակէ վարել ռազմատենչ քաղաքականութիւն: Ե՛ւ Թուրքիան, ե՛ւ Ազրպէյճանը ոտնահարած են ժողովրդավարութեան սկզբունքները, տարիներ շարունակ ապակայունացուցած շրջանը եւ կը շարունակեն խախտել խաղաղութիւնն ու կայունութիւնը շրջանին մէջ:
Ընկերվար երիտասարդներու միջազգային միութիւնը խստօրէն կը դատապարտէ Ազրպէյճանի կողմէ վերջին յարձակումը Արցախի վրայ եւ կը յորդորէ անմիջապէս դադրեցնել ռազմական գործողութիւնները, յատկապէս` խաղաղ բնակչութեան ուղղութեամբ: Պատմութիւնը ապացուցած է, որ ռազմական գործողութիւնը չի կրնար որեւէ կառուցողական բանի յանգեցնել, եւ երբեւէ ոչ մէկ կողմ պիտի շահի լայնածաւալ պատերազմէն:
Ընկերվար երիտասարդներու միջազգային միութիւնը նաեւ կը դատապարտէ Թուրքիոյ յարձակողապաշտ դիրքորոշումը եւ անոր շարունակական անխոհեմ քայլերը, որոնք կը նպաստեն շրջանի ապակայունացման:
Միութիւնը լիայույս է, որ տագնապի խաղաղ լուծումը կարեւոր է միայն լարուածութեան թուլացման եւ բանակցութիւններու վարման ճամբով` ԵԱՀԿ-ի Մինսքի խմբակի համանախագահներուն գլխաւորութեամբ, միջազգային իրաւունքի եւ 1975 թուականի Հելսինքեան համաձայնագիրներուն մէջ ամրագրուած սկզբունքներու հիման վրայ` բանակցային գործընթացի միջոցով:
Ընկերվար երիտասարդներու միջազգային միութիւնը միջազգային հանրութեան կոչ կ՛ուղղէ պահանջել ռազմական գործողութիւններու անյապաղ դադրեցում», նշուած է յայտարարութեան մէջ:
Ընկերվար երիտասարդներու միջազգային միութիւնը Ընկերվար միջազգայնականի ուղեկից երիտասարդական կազմակերպութիւն է, որուն կ՛անդամակցին աւելի քան 143 կազմակերպութիւններ աշխարհի շուրջ 100 երկիրներէ: ՀՅԴ Երիտասարդականը Ընկերվար երիտասարդներու միջազգային միութեան լիիրաւ անդամ է: