Ֆրանսան Հաստատեց Hydroxychloroquine-ը` «Քորոնա» Ժահրի Դէպքերու Բուժման Համար․ L’express

Աշխարհ

 «Քորոնա» ժահրի բուժման համար Hydroxychloroquine դեղամիջոցը կրնայ նշանակուիլ ու օգտագործուիլ: Այս մասին հրամանը հաստատուեցաւ երէկ, «Փանորամա»-ի փոխանցմամբ՝ կը գրէ L’express-ը:

Hydroxychloroquine-ի օգտագործումը պաշտպանող, Մարսէյլի համալսարանական հիւանդանոցի փրոֆէսոր Տիտիէ Ռաուլտ, որ հետազօտութիւն կատարած էր 24 հիւանդներու մասնակցութեամբ ու պարզած դեղամիջոցի օգտակարութիւնը, շնորհակալութիւն յայտնած է Ֆրանսայի առողջապահութեան նախարար Օլիվիէ Վերանին` «լսելու համար»:

Հրամանագիրով կ՛արգիլուի նաեւ Ֆրանսայի մէջ արտադրուող Plaquenil դեղամիջոցի, որ առեւտրային անուանում է, արտահանումը: Նշենք, որ ի սկզբանէ քլորոքինը կ՛օգտագործուի Մալարիայի բուժման մէջ:

Hydroxychloroquine-ի կիրառումը գիտական համայնքին մէջ բոլոր իրավիճակներուն չ՛ընդունուիր, կան հակասութիւններ: Սակայն ԱՄՆ նախագահ Տանըլտ Թրամփ եւս կը պաշտպանէ այս դեղամիջոցի օգտագործումը «Քորոնա» ժահրի բուժման համար:

Նախօրէին ՀՀ առողջապահութեան նախարարը եւս յայտնեց, որ արդէն 3 օր է, որ հիւանդները կը բուժեն այդ դեղով: