Հայաստանի Մէջ «Քարոնա» Ժահրէն Բուժուած է 28 Մարդ
ՀՀ առողջապահութեան նախարար Արսէն Թորոսեան այսօր ըսած է, որ այսօր «Քորոնա» ժահրի համավարակէն 10 բուժուած քաղաքացի կայ: Անոնց կրկնակի քննութիւնը բացասական եղած է:
Ընդհանուր առմամբ` այս պահուն 28 բուժուած քաղաքացի կայ եւ այժմ բուժման մէջ կը գտնուի 300 անձ:
«Երեկ տեղի ունեցած է մօտ 40 քաղաքացիներու մեկուսացումէն դուրս գալը, անոնց մօտ քննութիւնը եղած է բացասական եւ վերադարձած են տուն»,- ըսած է նախարարը:
Իսկ միւս հիւանդներու պարագային, ծայրայեղ ծանր վիճակի մէջ գտնուող մէկ քաղաքացի կայ, մէկ քաղաքացիի վիճակը ծանր է, իսկ մնացածի կեանքին այս պահուն որեւէ վտանգ չի սպառնար:
«Ունինք առանց ախտանշաններու բազմաթիւ վարակուածներ, որոնք պարզապէս մեկուսացման մէջ են հիւանդանոցներու կամ հիւրանոցներու մէջ»,- նշած է Արսէն Թորոսեան:
Նախարարը հաստատած է նաեւ, որ 2-ամսական երեխայի եւ մօր վարակման դէպք կայ.
«Երեխան ընդհանրապէս ախտանշաններ չունի, մայրն է 2 օր ջերմութենէ ետք, այս պահուն ախտանշաններ չունի: Անոնք հիւանդանոցի մէջ են` բժիշկներու հսկողութեան տակ»: