ՀՀ Վարչապետը Ողջունած է ԱՄՆ Ներկայացուցիչներու Պալատին Կողմէ Հայոց Ցեղասպանութեան Ճանաչումը

ՀՀ վարչապետ Նիկոլ Փաշինեան Twitter-ի իր էջին միջոցով ողջունած է Հայոց Ցեղասպանութեան ճանաչման վերաբերեալ ԱՄՆ Ներկայացուցիչներու պալատի պատմական քուէարկութիւնը։

«Կ՝ողջունեմ Հայոց Ցեղասպանութեան ճանաչման վերաբերեալ ԱՄՆ Քոնկրէսի Ներկայացուցիչներու պալատի պատմական քուէարկութիւնը։ Բանաձեւը հզօր քայլ է պատմական արդարութեան ու ճշմարտութեան ուղղութեամբ, որ նաեւ մխիթարանք կը հաղորդէ Հայոց Ցեղասպանութենէն փրկուածներու ժառանգներուն։ Ընդունեցէք իմ սրտանց շնորհաւորանքներն ու հիացմունքը ուղղուած ամերիկահայերու սերունդներուն, որոնց անձնազոհ քաղաքական ու հասարակական գործունէութիւնն ու հաստատակամութիւնն էին այս պատմական քուէարկութեան շարժիչ ուժն ու ոգեւորութիւնը։ Այլեւս երբեք»,- նշած է վարչապետ Փաշինեան։

Նշենք, որ ԱՄՆ Քոնկրէսի Ներկայացուցիչներու պալատը, Հոկտեմբեր 29-ին կայացած քուէարկութեան իբրեւ արդիւնք, ձայներու մեծամասնութեամբ ընդունեց Հայոց Ցեղասպանութիւնը ճանչցող բանաձեւը։ Քուէարկութեան մասնակցած քոնկրէսականներէն կողմ քուէարկեց 405-ը, դէմ՝ 11-ը։