Հայաստանի Հանրապետութեան եւ Ռուսիոյ Դաշնութեան կառավարութիւններուն համատեղ որոշումով Սուրիոյ Արաբական Հանրապետութիւն ուղարկուեցաւ Ռուս-հայկական մարդասիրական արձագանգման կեդրոնին կողմէ տրամադրուած հերթական մարդասիրական օգնութիւնը:
ՀՀ ԱԻՆ տեղեկատւութեան եւ հասարակայնութեան հետ կապերու վարչութեան տեղեկութիւններով՝ օգնութիւնը ուղարկուած է մարդասիրական արձագանգման կեդրոնի միջոցներուն հաշուին:
Մարդասիրական օգնութիւնը նախատեսուած է Սուրիոյ բնակչութեան համար, որ տուժած է ռազմական խնդիրներու հետեւանքով:
ԱԻ նախարար Ֆելիքս Ցոլակեան 9 բեռնատարներու մէջ բեռցուած մարդասիրական օգնութիւնը ճանապարհած է դէպի Սուրիա:
Անիկա կը պարունակէ միսի պահածոյ՝ 52,5 թոն, ձուկի պահածոյ՝ 35 թոն, 40 թոն շաքար, ինչպէս նաեւ չոր օրապահիկ՝ մօտ 14,5 թոն կշիռքով:
Հայկական եւ ռուսական կողմերուն ներկայացուցիչները մարդասիրական օգնութիւնը պիտի յանձնեն Սուրիոյ Կարմիր մահիկի ներկայացուցչութեան, որուն միջոցով ալ պէտք է իրականացուի յետագայ բաշխումը: