Պարոնուհի Քերոլայն Քոքս Դարձեալ Արցախ Կը Գտնուի
Մեծ Բրիտանիոյ եւ Հիւսիսային Իռլանտայի Միացեալ Թագաւորութեան լորտերու պալատի անդամ Պարոնուհի Քերոլայն Քոքս դաձեալ Արցախ կ՛այցելէ։ Յունիս 13-ին ան հանդիպում ունեցած է Արցախի Հանրապետութեան Նախագահ Բակօ Սահակեանի եւ Արտաքին գործոց նախարար Մասիս Մայիլեանի հետ։
Նախագային հետ հանդիպման ժամանակ քննարկուած են ատրպէյճանա-ղարաբաղեան հակամարտութեան կարգաւորման, Արցախի ներքին ու արտաքին քաղաքականութեան եւ տարածաշրջանային գործընթացներուն վերաբերող հարցեր:
Երկրի ղեկավարը բարձր գնահատած է Պարոնուհիին աջակցութիւնը Արցախին` ատիկա համարելով անշահախնդիր մարդասիրութեան եւ անկեղծ ընկերութեան օրինակելի դրսեւորում:
Արցախի Հանրապետութեան արտաքին գործոց նախարար Մասիս Մայիլեանի հետ հանդիպման ժամանակ նախարար Մայիլեան բարձր է գնահատած է Քերոլայն Քոքսի գործունէութիւնը` ուղղուած միջազգային ասպարէզին մէջ Արցախի շահերու պաշտպանութեան, նշելով անկախութեան տարիներուն անոր անգնահատելի ներդրումը Արցախի ժողովուրդի պայքարին` յանուն իր գաղափարներու եւ նպատակներու իրականացման:
Հանդիպման ընթացքին նախարարը ներկայացուցած է ատրպէյճանա-ղարաբաղեան հակամարտութեան կարգաւորման ներկայ փուլը, անդրադարձած Արցախի միջազգային ճանաչման եւ ապակեդրոնացուած համագործակցութեան գործընթացի վերջին զարգացումներուն: Տեղի ունեցած է նաեւ մտքերու փոխանակում` Արցախի մէջ իրականացուող մարդասիրական ծրագիրներու հետ կապուած շարք մը հարցերու շուրջ: