Խաչատրեանի 15-րդ Միջազգային Մրցոյթին 12 Երկրի 30 Դաշնակահար Պիտի Մասնակցի

Մեծանուն երաժշտահան Արամ Խաչատրեանի ծննդեան օրը, Յունիս 6-ին, Երեւանի մէջ սկիզբ առնող Խաչատրեանի 15-րդ միջազգային մրցոյթին պիտի մասնակցի աշխարհի 12 երկրի 30 երաժիշտ։ Այս մասին կը տեղեկացնեն «Արամ Խաչատրեան-մրցոյթ» մշակութային հիմնադրամէն:

Մրցոյթը պիտի կայանայ դաշնակ մասնագիտութեամբ։ Մասնակիցները պիտի ներկայացնեն Հայաստանը, ԱՄՆ-ն, Գանատան, Ֆրանսան, Իտալիան, Ճափոնը, Չինասատանը, Հարաւային Քորէան, Թայլանտը, ՌԴ-ն, Ղազախստանը, Ուքրանիան։

Խաչատրեանի 15-րդ միջազգային մրցոյթի ժիւրին պիտի նախագահէ աշխարհաճանաչ դաշնակահար եւ խմբավար Վահագն Պապեանը։

Խաչատրեանի միջազգային մրցոյթը Միջազգային երաժշտական մրցոյթներու համաշխարհային ֆետերասիոնի (World Federation of International Music Competitions) անդամ է։ Մրցոյթը կ՝իրականացուի ՀՀ մշակոյթի նախարարութեան, «Արամ Խաչատրեան-մրցոյթ» մշակութային հիմնադրամի համատեղ ջանքերուն շնորհիւ, գործընկերն է ԱՊՀ Մարդասիրական համագործակցութեան միջպետական հիմնադրամը: