Այսօր Պետոյի (Պետրոս Ղեւոնդեան) Ծննդեան Օրն է (տեսանիւթ)

Այսօր Արցախի հերոս, Դաշնակցական Պետրոս Ղեւոնդեանի ծննդեան օրն է:

Պետրոս Ղեւոնդեան ծնած է 1964 Յունուար 30-ին, ՀԽՍՀ Նայիրի շրջանի Պռոշեան գիւղին մէջ։ Եղած է Շուշի առանձնակի գումարտակի հրամանատարի տեղակալը, Պռոշեանի կամաւորական ջոկատի փոխհրամանատարը։ 1990-1994 թթ. մասնակացած է ՀՀ սահմանամերձ շրջաններու եւ ԼՂՀ ինքնապաշտպանական եւ ազատագրական մարտերուն։ Իր հրամանատարութեամբ գործող գումարտակին հետ մասնակցած է Շահումեանի, Մարտակերտի, Մարտունիի եւ Հադրութի շրջաններու տասնեակ բնակավայրերու ազատագրման մարտերուն, Քարվաճառի թշնամական յենակէտերու ոչնչացման ռազմագործողութեան՝ բազմիցս ցուցաբերելով խիզախութիւն ու հերոսութիւն։

Նահատակուած է 1994 Փետրուար 14-ին, Քարվաճառի մէջ, վիրաւոր զինակիցին օգնութիւն ցոյց տալու ժամանակ։

1996-ին, յետմահու, ԼՂՀ-ի կողմէ պարգեւատրուած է «Մարտական խաչ» շքանշանով, 2000-ին` Արցախի հերոս կոչումով:

ԵՊՀ ռատիոֆիզիքայի բաժանմունքի ազատամարտիկ-շրջանաւարտին անունով անուանակոչուած է Պռոշեանի եւ Եղէգնուտի միջնակարգ դպրոցները։ 2007-ին, անոր հարազատ բաժանմունքին մէջ, բացուած է Պետրոս Ղեւոնդեան անունը կրող լսարան։ 2010 Ապրիլ 10-ին, Քաշաթաղի շրջանի Տիգրանաւան գիւղի միջնակարգ դպրոցը անուանակոչուած է Պետրոս Ղեւոնդեանի անունով։