Կարօ Փայլանը Անձեռնմխելիութենէն Զրկելու Վերաբերեալ Միջնորդութիւն Ներկայացուցած է Նաեւ Դատախազութիւնը
Թուրքիոյ նախագահականէն ետք քրտամէտ «Ժողովուրդներու ժողովրդավարական կուսակցութեան (HDP) հայ երեսփոխան Կարօ Փայլանը անձեռնմխելիութենէն զրկելու միջնորդութիւն ներկայացուցած է նաեւ Տիարպեքիրի դատախազութիւնը:
Այս մասին կը հաղորդէ «Արմենփրես»-ը՝ վկայակոչելով demokrathaber.org-ը:
Դատախազութիւնը միջնորդութիւնը ներկայացուցած է Փայլանի դէմ Թուրքիոյ օրէնսգիրքի 301 յօդուածով սկսած հետաքննութեան ծիրէն ներս: Յօդուածը թուրք ժողովուրդին եւ Թուրքիոյ պետութեան, պետական մարմիններու հասցէին վիրաւորանք հնչեցնելու համար պատիժ կը նախատեսէ։
Փայլանի նկատմամբ հետաքննութիւնը սկսած է անոր ըրած յայտարարութենէն ետք, երբ ան ըսած էր. «Տիարպեքիրի ամէն անկիւնը կարելի է ռազմական սարքեր ու ջրցան մեքենաներ տեսնել, ինչ որ կը յիշեցնէ Հիթլերի ու Մուսոլինիի ժամանակաշրջանը»:
Իշխանութիւններուն կողմէ պատգամաւորի յայտարարութիւնը դիտուած է որպէս վիրաւորանք թրքական իշխանութիւններուն եւ պետութեան նկատմամբ:
2018-ի Դեկտեմբերի վերջը Թուրքիոյ նախագահականը կրկին Կարօ Փայլանը անձեռնմխելիութենէն զրկելու միջնորդութիւն ներկայացուցած էր:
Թուրքիոյ նախագահականը, Փայլանէն բացի, պատգամաւորական անձեռնմխելիութենէն զրկելու միջնորդութիւն ներկայացուցած է նաեւ խորհրդարանի եւս 7 երեսփոխաններու համար:
Միջնորդութիւնը ուղարկուած էր Թուրքիոյ խորհրդարանի սահմանադրական եւ արդարադատութեան խառն յանձնաժողով, որու հաստատումէն ետք պիտի ուղարկուի Արդարադատութեան նախարարութիւն: