«Համազգային»ի 90-ամեակին Նուիրուած Տօնակատարութիւն Յունաստանի Մէջ (նկարներ)
Ազգ մը առանց մշակոյթի ապագայ չունի: Մշակոյթը ժողովուրդներու զգացողութեան կամրջման վայրն է: Լաւ եւ որակաւոր մշակոյթը բոլորին համար միեւնոյն երգը կ՚երգէ: Մշակոյթը հայերուն համար այնպիսի կարեւոր դեր խաղցած է իրենց կեանքին մէջ, որ թերեւս հայերն ալ բոլորովին անոր ամբողջական դերն ու արժէքը հասկցած չեն: Մշակոյթը հայուն կը յիշեցնէ իր ազգային արժէքներուն վերադարձը:
Հայ մարդու արժէքներուն ընդմէջէն վստահինք հայ մշակոյթին:
1928-ին, Հայաստանի Հանրապետութեան անկախութենէն ուղիղ տասնամեակ մը յետոյ, Գահիրէի մէջ խումբ մը մտաւորական տիտաններ, ինչպէս Լեւոն Շանթ, Նիկոլ Աղբալեան, Գասպար Իփէկեան եւ ուրիշներ, հիմը կը դնէին այս աշխարհատարած մեծ կազմակերպութեան, որ կոչուած էր արտերկրի հայութեան ուծացնող վտանգաւոր պայմաններուն մէջ մշակոյթի ճամբով պահելու եւ պահպանելու հայ լեզուն, գիրն ու գրականութիւնը, երգն ու նուագը, իրարու յաջորդող եւ ձուլումի ենթակայ երիտասարդ սերունդները հայկական բարձր արժէքներու անդաստանին մէջ պաշտպանելու առաջադրանքով:
Անցնող 9 տասնամեակներու դժուարին պայմաններուն մէջ, համահայկական կազմակերպութեան մը տարածքը ստացած այս միութիւնը, իր տաքուկ գիրկին մէջ համախմբեց 1915-ի ցեղասպանութենէն տարտղնուած հայու ջախջախուած բեկորները, եւ դաստիարակեց զանոնք պատմամշակութային մեր արժէքներուն տէր կանգնելու եւ գուրգուրալու մեր դարաւոր ժառանգութեան արժէքներուն վրայ, հաւատարիմ ու պահապան մնալով հայութեան անփոխարինելի առաքելութեան ու պայքարի տեսլականներու իրականացման:
«Համազգային»ի հիմնադրութեան 90-րդ տարեդարձին առիթով, ամբողջ տարուան ընթացքին, Հայաստանի թէ սփիւռքի բոլոր հայագաղութներուն մէջ, յոբելինական հանդիսութիւններ ու տօնակատարութիւններ տեղի ունեցան, որոնց ընթացքին վեր առնուեցան տուեալ միութեան դերն ու գործունէութիւնը հայ կեանքի վարժարանային ցանցի (Պէյրութ, Մարսէյլ, Իսի-լէ Մուլինօ եւ Սիտնի), երիտասարդ հայ նոր սերունդին հայեցի դաստիարակութիւն ջամբելու առաքելութեամբ:
***
Տօնակատարութիւնը սկսաւ տեսերիզի (վիտէօ) մը ներկայացմամբ, պատրաստուած Հայաստանի մէջ, ուր թատերականացուած բեմադրութեամբ կը ներկայացուէր «Համազգային»ի հիմնադրութեան առաջին հանդիպումը Գահիրէի մէջ, խումբ մը մտաւորական ընկերներու կողմէ (Շանթ, Աղբալեան, Իփէկեան, Օհանջանեան, Ստեփան Եսայեան, Մինաս Խաչատուրեան, Սեդրակ Պալըգճեան, Յակոբ Պալըգճեան, Սարգիս Մալխասեան, եւայլն):
Յայտագրի ընթացքին ներկայացուեցաւ երկրորդ տեսերիզ մըն ալ, որ կ՚անդրադառնար յատկապէս Յունաստանի «Համազգային»ի հիմնադրութեան ու գործունէութեան, հին օրերէն մինչեւ մեր օրերը միութեան բազմամարզ աշխուժութեանց եւ ելոյթներուն ընդմէջէն:
«Համազգային»ի տօնակատարութիւնը իրենց ներկայութեամբ պատուած էին «Համազգային»ի Կեդրոնական Վարչութեան ատենապետ ընկ. Մկրտիչ Մկրտիչեան, Հ. Յ. Դ. Կեդրոնական Կոմիտէի ներկայացուցիչ ընկ. Քերովբէ Էքիզեան, յունահայոց Ազգային Վարչութեան ներկայացուցիչ ընկ. Թագւոր Յովակիմեան, Հ.Օ.Մ.-ի Կեդրոնական Վարչութեան անդամ ընկ. Լիզա Աւագեան, Հ. Կ. Խաչի Յունաստանի Շրջանային Վարչութեան ատենապետուհի ընկ. Լիզէթ Գիրազեան, Հ.Մ.Ը.Մ.-ի Շրջանային Վարչութեան եւ մասնաճիւղներու վարչութեանց ատենապետներ, Հ.Յ.Դ. Յունաստանի Երիտասարդական Միութեան Կեդրոնական Վարչութիւնը, միութենական կառոյցներ, Աթէնքի հոգեւոր հովիւ Հրայր Ա. Քհնյ. Նիկոլեան:
Հանդիսավարութիւնը կը կատարէր «Համազգային»ի Շրջանային նորընտիր Վարչութեան քարտուղարուհի ընկ. Արշալոյս Սափրիչեան:
«Աթինայիքօ» հանդիսասրահի մուտքին, «Համազգային»ի Շրջանային Վարչութեան կողմէ պատրաստուած էր ցուցահանդէս մը, ուր կը հանդիսադրուէին միութեան գործունէութիւնը ներկայացնող լուսանկարչական ալպոմներ, աֆիշներ, յայտագիրներ, նամակներ, պարգեւատրումներ, շքանշաններ ու յուշատախտակներ, նամակներ, հրատարակութիւններ, «Համազգային»ի պատրաստութեամբ «Լալան ու Արան» հայերէն խօսող պուպրիկներ, եւայլն, որ մեծապէս գրաւեցին ժողովուրդին հետաքրքրութիւնը, որ մօտենալով սեղաններուն թղթատեց, դիտեց, կարդաց, իսկ հիները վերապրեցան անցեալի յիշատակներու երանելի օրեր ու պահեր:
«Համազգային»ի թղթակից
Յունաստան