ՀՀ Վարչապետը Այցելած է Նիւ Եորքի Մեթրոփոլիթէն Թանգարանին Մէջ Բացուած «Արմէնիա» Խորագիրով Ցուցահանդէս
ՀՀ վարչապետ Նիկոլ Փաշինեան, Ամենայն Հայոց կաթողիկոս Գարեգին Երկրորդի հետ, այցելած է Նիւ Եորքի հանրայայտ Մեթրոփոլիթէն թանգարանին մէջ բացուած «Արմէնիա» խորագիրով ցուցահանդէս: ՀՀ վարչապետի աշխատակազմի տեղեկատւութեան եւ հասարակայնութեան հետ կապերու վարչութեան փոխանցած տեղեկութիւններով՝ վարչապետը շրջայց կատարած է ցուցասրահներուն մէջ, ծանօթացած ներկայացուած հայկական արուեստի ու մշակոյթի լաւագոյն նմուշներուն՝ սկսած 4-րդ դարէն մինչեւ 17-րդ դար:
Վարչապետը նշած է, որ 2018 թուականը խորհրդանշական տարի է, որուն ընթացքին զգալիօրէն ամրապնդուած են հայ-ամերիկեան մշակութային կապերը: «Այս տարի հայկական մշակոյթը կը ներկայացուի Ամերիկայի Միացեալ Նահանգներու մէջ աննախադէպ ձեւով՝ մօտեցնելով Հայաստանի մշակութային եւ քաղաքակրթական ժառանգութիւնը մեր ամերիկացի բարեկամներուն: Այս տարի կը նշուի ամերիկեան հողի վրայ հայկական ներկայութեան 400-ամեակը: 1618 թուականին, առաջին հայը՝ Մարթին անունով, հասած է Վիրճինիայի ափեր եւ բնակութիւն հաստատած Ճէյմսթաունի մէջ: Այդ օրէն ի վեր, մեր հայրենակիցներուն ներկայութիւնը այս հողին վրայ չի ընդհատուած, ինչպէս եւ անոնց ներդրումը իրենց նոր հայրենիքի մշակոյթին մէջ: Այս տարի, աւելի վաղ, հայկական մշակոյթը՝ սովորոյթներն ու աւանդոյթները, ցուցադրուած են Ուաշինկթընի՝ ԱՄՆ մայրաքաղաքի սրտին մէջ, ազգային Մոլին մէջ, Սմիթսոնեան ժողովրդական կեանքի փառատօնին ծիրէն ներս: Անիկա մեզի աննախադէպ հնարաւորութիւն տուաւ հայկական մշակոյթը իր իւրայատուկ բազմազանութեամբ ներկայացնելու ամերիկեան հասարակութեան, ինչպէս նաեւ աշխարհի տարբեր անկիւններէ ժամանած հազարաւոր զբօսաշրջիկներու: Քանի մը շաբաթ առաջ, մեր երկու ժողովուրդները միասին նշեցին Փուլիթցերեան մրցանակակիր, դրամատուրգ եւ գրող Ուիլիըմ Սարոյեանի ծննդեան 110-ամեակը: Սարոյեանի ժառանգութիւնը նշելու նպատակով, որ մեծ արժէք է մեր երկու ժողովուրդներուն համար, հեղինակի հայրենի Քալիֆորնիա նահանգի Ֆրեզնօ քաղաքին մէջ բացուած է Սարոյեանի թանգարանը: Իբրեւ Միացեալ Նահանգներու մէջ Հայաստանի համար այս աննախադէպ իրադարձային մշակութային տարուան գագաթնակէտը` այժմ ես մեծ պատիւ ու անձնական ուրախութիւն ունիմ ականատես ըլլալու այս իւրայատուկ ցուցահանդէսի բացման, շատ առումներով եզակի ցուցահանդէս»,- ըսած է վարչապետը` աւելցնելով, որ անիկա կը ներկայացնէ հայկական ընդելուզուած մշակոյթը, իբրեւ նաեւ արեւմտեան մշակոյթի եւ քրիստոնեայ քաղաքակրթութեան ներկայացուցիչ:
Վարչապետը նշած է, որ ցուցահանդէսին ներկայացուած 14 դարերու հայկական ժառանգութիւնը՝ իր անգին գլուխգործոցներով, ամբողջ աշխարհէն հաւաքուած է Մեթրոփոլիթէնի` աշխարհի ամենակարեւոր թանգարաններէն մէկուն մէջ, եւ համոզում յայտնած, որ անիկա, անկասկած, Միացեալ Նահանգներու մէջ պիտի փոխէ Հայաստանի եւ հայկական արուեստի նկատմամբ ընկալումն ու գնահատականը: «Այս նշանաւոր նախաձեռնութեան շնորհիւ՝ Մեթրոփոլիթէնի տասնեակ հազարաւոր այցելուներ պիտի ծանօթանան մեր ազգի պատմական եւ մշակութային ժառանգութեան, որ առաջինը ընդունած է քրիստոնէութիւնը իբրեւ պետական կրօն: Այսօր կը ներկայացուին աւելի քան 140 նմուշներ` պատկերազարդ ձեռագիրներ, եկեղեցիներու մանրանկարներ, խաչքարեր, տպագիր գիրքեր եւ այլ եզակի ցուցանմուշներ, ներառեալ Թորոս Ռոսլինի, Սարգիս Պիցակի, Թորոս Տարօնացիի, Յակոբ Ջուղաեցիի, Գրիգոր Տաթեւացիի ստեղծագործութիւններ»,- ըսած է վարչապետը` աւելցնելով, որ շատերու համար Մեթրոփոլիթէնի մէջ «Հայաստան» ցուցահանդէսը երազանքի իրականացում է: Վարչապետը աւելցուցած է, որ անիկա հնարաւոր դարձած է տիկին Հելեն Էվանսի եւ անոր գործընկերներու ջանքերուն շնորհիւ: Նիկոլ Փաշինեան շնորհակալութիւն յայտնած է նաեւ թանգարանի նախագահ Դանիէլ Վայսին, թանգարանի տնօրէն Մաքս Հոլիին, ձեռնարկի համակարգողներուն, ինչպէս նաեւ բոլոր անհատ նուիրատուներուն, հիմնադրամներուն, Երուսաղէմի եւ Կոստանդնուպոլսոյ Հայոց պատրիարքարաններուն, Մայր Աթոռ Սուրբ Էջմիածինին:
Ցուցահանդէսը կը ներկայացնէ հայկական արուեստի ու մշակոյթի լաւագոյն նմուշները՝ սկսեալ 4-րդ դարէն մինչեւ 17-րդ դար: Ցուցադրութիւնը նուիրուած է հայ ժողովուրդի գեղարուեստական եւ մշակութային ձեռքբերումներուն համաշխարհային ծիրէն ներս: Ցուցադրութեան ներկայացուած է 140 նմոյշ: