Հայաստանի Նախագահը Պիտի Մասնակցի Արամ Ա. Կաթողիկոսի Քահանայական Ձեռնադրութեան 50-ամեակի Ս. Պատարագին

Հայաստանի Հանրապետութեան նախագահ Արմէն Սարգսեան Սեպտեմբեր 13-ին ընդունած է Թեհրանի հայոց թեմի առաջնորդ Սեպուհ արք. Սարգիսեանն ու կաթողիկոսարանի տեղեկատուական բաժանմունքի վարիչ Պետրոս վրդ. Մանուէլեանը:

Սրբազան հայրը հանրապետութեան նախագահին յանձնած է Մեծի Տանն Կիլիկիոյ կաթողիկոսութեան Ազգային կեդրոնական վարչութեան հրաւէրը` մասնակցելու Մեծի Տանն Կիլիկիոյ Արամ Ա. կաթողիկոսին քահանայական ձեռնադրութեան 50-ամեակին առիթով Անթիլիասի մայրավանքի Ս. Գրիգոր Լուսաւորիչ մայր տաճարին մէջ մատուցուելիք Ս. պատարագին:

Պատարագին հրաւիրուած են նաեւ Լիբանանի Հանրապետութեան նախագահ Միշել Աունը, Լիբանանի պետական եւ քաղաքական անձնաւորութիւններ: