Տեղի Պիտի Ունեցայ Հրանդ Տինքի Անուան 10-րդ Մրցանակաբաշխութիւնը
Հրանդ Տինքի մահէն ետք իր անունով հիմնուած հիմնարկին կողմէ կեանքի կոչուած Միջազգային Հրանդ Տինք մրցանակը 10-րդ անգամ կը գտնէ իր տէրը Հրանդ Տինքի ծննդեան օրին՝ Սեպտեմբեր 15-ին։ Լիւթֆի Քըրտար մշակոյթի կեդրոնին մէջ տեղի ունենալիք մրցանակաբաշխութեանիր մասնակցութիւնը կը բերէ փարիզահայ «Քոլեկթիֆ մեծ պազար» երաժշտական խումբը։ Այս մասին կը հաղորդէ “Ակօս”-ը։
10-րդ տարուայ առթիւ տեղի պիտի ունենայ նաեւ բանախօսութիւն մը նոյն դահլիճին մէջ Սեպտեմբեր 14-ին։ Բանախօսութեան բացումը պիտի կատարէ Հարուըրտ համալսարանի դասախօսներէն Քեթրին Սիկկինք։ Յաջորդող ելոյթներուն մէջ պիտի հանդիպինք Քենեթ Ռոթհ, Իսմաիլ Պէշիկչի, Շեպնեմ Քորուր Ֆինճանճը, Ալփեր Կէօրմիւշ, Ամիրա Հաաս, Ահմետ Ալթան, Էրճան Քեսէր, Ալպի Սահս, Ալի Պայրամօղլու, Թերեսա Քաչինտամոթօ, Ահմետ Ինսել եւ Տակլս Ճանսն անուններուն։
Նախորդ տարիներուն բացի անհատներէ, մարդու իրաւունքի պաշտպանութեան գիծով աշխատող կարգ մը հասարակական կազմակերպութիւններ եւս արժանացած էին Հրանդ Տինք մրցանակին։ Այդ իսկ պատճառաւ զեկուցողներու անուանացանկին մէջ կը տեսնենք Տիարպեքիրի Փաստաբաններու Կաճառը, «Մեմորիըլ» խմբակցութիւնը, Շաբաթօրեայ Մայրերը, պարտադիր զինուորական ծառայութիւնը մերժող՝ խղճով մերժելու շարժումը եւ միասեռականներու իրաւունքները պաշտպանող Քաօս ԿԼ-ն։
Բանախօսութեան ընթացքին ելոյթներով հանդէս պիտի գան նախորդ տարիներուն այս մրցանակին արժանացած մտաւորականներ եւ մրցանակի դատակազմի անդամներ։
Չորս նիստերով նախատեսուած բանախօսութիւնը քննարկումներ պիտի ընէ «Ի դէմ բոլոր դժուարութիւններու, արդարութեան որոնումը», «Բեւեռացուած աշխարհի վրայ լրագրողութեան եւ տեղեկութեան դերակատարութիւնը», «Հասարակական յիշողութիւն, իրողութեան որոնում եւ կամք», «Մարդու իրաւունքներու ազատութեան եւ հասարակութեան պաշտպանութիւնը» խորագիրներով։ Չորս նիստերէն ետք տեղի պիտի ունենան փակման զեկոյցները։