Բոլոր Հայ Գերիները Ազատ Արձակելու Պահանջով՝ Քոնկրեսին Դիմելու Արշաւ

Ամերիկայի Հայ Դատի յանձնախումբը Ազրպէյճանի մէջ պահուող բոլոր հայ գերիները ազատ արձակելու պահանջով քոնկրեսականներուն դիմելու արշաւի մը նախաձեռնած է, նոյն ժամանակ քննադատելով Միացեալ Նահանգներու արտաքին գործոց նախարարին 5 Մայիսի յայտարարութիւնը՝ ազատ արձակուած երեք հայ ռազմագերիներուն վերաբերեալ։

Նշենք, որ նախարար Էնթընի Պլինքըն գրած էր, թէ Ամերիկա կ՛ողջունէ Ազրպէյճանի կողմէ երեք հայ «բանտարկեալներուն» ազատ արձակումը եւ կոչ ըրած էր երկու կողմերուն, որ «ամողջութեամբ եւ արագօրէն աւարտեն բոլոր բանտարկեալներուն եւ դիերու փոխանակման գործընթացը ու յարգելու բանտարկեալներուն նկատմամբ մարդասիրական վերաբերում ապահովելու իրենց պարտաւորութիւնները»:

Ամերիկայի Հայ Դատի յանձնախումբը շեշտեց, թէ Միացեալ Նահանգներու կառավարութիւնը սխալ ընթացքի մէջ է եւ «կը շարունակէ Ազրպէյճանի կողմէ պատանդ պահուող հայերը ներկայացնել՝ իբրեւ բանտարկեալներ եւ ոչ թէ ռազմագերիներ: Այս բառախաղը Պաքուին կարելիութիւն կու տայ պահելու, խոշտանգելու եւ սպաննելու հայ ռազմագերիները»:

Արշաւին միանալու համար այցելել www.anca.org/prisoners կայքէջը։