Հայ-թրքական Սահմանը Ապօրինի Հատած Փաքիստանի Քաղաքացիներ Ձերբակալուած են
Հայաստանի մէջ Ռուսիոյ անվտանգութեան ծառայութեան սահմանապահ վարչութեան աշխատակիցները հայ-թրքական սահմանը ապօրինի հատած երկու անձ ձերբակալած են: Ըստ «Արմենփրես»-ի` ծառայութեան ընթացքին սահմանապահ հերթափոխը Թուրքիոյ տարածքին նկատած է երկու անյայտ անձ, որոնք փորձած են լողալով անցնիլ Արաքս գետը:
Քանի մը ժամ անց անյայտ անձիք հատած են պետական սահմանը եւ փորձած թաքնուիլ Հայաստանի տարածքին մէջ: Ռուս սահմանապահները հետապնդած են սահմանախախտները եւ ձերբակալած: Ձերբակալման ընթացքին սահմանախախտները փորձած են դիմադրել, սակայն սահմանապահները կրցած են չէզոքացնել զանոնք:
Հարցաքննութենէ ետք պարզ դարձած է, որ սահմանախախտները Փաքիստանի Իսլամական Հանրապետութեան քաղաքացիներ են:
Օրէնսդրական կարգի համաձայն` սահմանախախտները փոխանցուած են Հայաստանի իրաւապահ մարմիններուն, որոնք պիտի պարզեն անոնց հայ-թրքական սահմանը խախտելու նպատակները: