«Երկինքի Մէջ` Դրախտ, Երկրի Վրայ` Վան». Բրիտանական Պարբերականը Գրած է Վանայ Լիճի ու Հայերու Մասին
The Telegraph բրիտանական պարբերականը զբօսաշրջիկներուն խորհուրդ կու տայ այցելել Վանայ լիճ ու կը յիշեցնէ, որ Առաջին համաշխարհային պատերազմէն առաջ այդ տարածքին մէջ ապրած են հայերը:
Ըստ “Սփութնիք”-ի՝ Վանայ լիճը Թուրքիոյ ամենալաւ պահպանուող գաղտնիքներէն է: Տեսարժան վայրը այսպէս կը նկարագրէ The Telegraph բրիտանական պարբերականը:
Յօդուածին մէջ զբօսաշրջիկներուն խորհուրդ կը տրուի այցելել բարձրադիր լիճ, ծանօթանալ հայկական մշակոյթին ու հին եկեղեցիներուն:
Պարբերականը կը նշէ` զարմանահրաշ Վանայ լիճը, որ շրջապատուած է 4000 մեթր բարձրութեան հասնող լեռնագագաթներով, աւելի մօտ է Թեհրանին, քան Պոլսոյ: Յօդուածին հեղինակ Թերի Ռիչըրտսըն կ՛ընդգծէ, որ դեռ Առաջին համաշխարհային պատերազմէն առաջ այստեղ ապրած են հայերը:
«Լիճի շուրջ կառուցուած միջնադարեան բազում եկեղեցիները կը վկայեն այստեղ ապրած հայերու աշխատասիրութեան մասին: Անոնք կը սիրէին կրկնել. «Երկինքի մէջ՝ դրախտ, երկրի վրայ` Վան», – կը գրէ լրագրողը:
The Telegraph–ը կը յիշեցնէ` լիճի շրջակայ տարածքը դարեր շարունակ խիտ բնակեցուած ու ծաղկուն տարածք եղած է, ուրկէ անցած է Մետաքսի ճանապարհը:
