Նիկոլ Փաշինեան Ցաւակցական Նամակ Յղած է Ֆրանսայի Նախագահ Էմանուէլ Մաքրոնին
Հայաստանի Հանրապետութեան վարչապետ Նիկոլ Փաշինեան ցաւակցական նամակ յղած է Ֆրանսայի նախագահ Էմանուէլ Մաքրոնին՝ Ապրիլ 15-ին, Փարիզի Աստուածամօր տաճարին մէջ բռնկած հրդեհին առիթով: Այս մասին կը յայտնեն ՀՀ վարչապետի աշխատակազմի տեղեկատւութեան եւ հասարակայնութեան հետ կապերու վարչութենէն։
Նամակին մէջ, մասնաւորապէս, ըսուած է.
«Մեծարգոյ՛ պարոն Նախագահ, ցնցուած ենք Փարիզի մէջ տեղի ունեցած ողբերգութեամբ: Փարիզի Աստուածամօր տաճարը եւրոպական քաղաքակրթութեան եւ ողջ քրիստոնէական աշխարհի ամենանշանակալից եւ սիրուած խորհրդանիշերէն է: Հայերուս համար անիկա ֆրանսական մշակոյթի եւ հոգեւոր ժառանգութեան իւրատեսակ մարմնաւորում է, որուն հետ մենք նոյնացուցած ենք Փարիզն ու անոր բազմադարեայ պատմութիւնը:
Հայաստան իր համերաշխութիւնը կը յայտնէ ֆրանսացիներուն եւ կը կիսէ անոնց զգացումները:
Միաժամանակ լիայոյս ենք, որ բոլորիս համատեղ ջանքերով կը ձեռնարկուին անհրաժեշտ քայլեր՝ տաճարի նախկին տեսքը վերականգնելու նպատակով»։