Վարազդատ Լալայեանը Դարձաւ Ծանրամարտի Ախոյեան, Սիմոն Մարտիրոսեանը` Արծաթէ Մետալակիր

Քաթարի մայրաքաղաք Տոհայի մէջ աւարտեցաւ ծանրամարտի «Կրան Բրի» առաջնութիւնը։ Մրցութային վերջին օրը մրցահարթակ հասած էին գերծանր քաշային տղամարդիկ, ուր Հայաստանը ունէր 2 ներկայացուցիչ։ Այս մասին կը հաղորդէ abcmedia.am-ը։

Մեր 2 մարզիկներն ալ ունեցան հիանալի ելոյթ՝ զբաղցնելով պատուոյ հարթակի առաջին երկու աստիճանները։ Երկամարտի 441 քկ արդիւնքով (200 + 241) առաջնութեան յաղթող դարձաւ Վարազդատ Լալայեանը, երկրորդ տեղը գրաւեց Սիմոն Մարտիրոսեանը, որ գրանցեց երկամարտի 430 քկ արդիւնք (190 + 240):

Առաջնութեան չէր մասնակցեր Պահրէյնը ներկայացնող Հայաստանի հաւաքականի նախկին անդամ Գոռ Մինասեանը, սակայն ան կը գտնուէր մրցավայրին մէջ եւ կ՝օգնէր մեր մարզիկներուն ու մարզիչներուն։