Արցախի Խորհրդարանը Միաձայն Ընդունեց ԵԱՀԿ Մինսկի Խումբի Համանախագահութեան, ՄԱԿ-ին եւ Համապատասխան Կառոյցներուն Դիմելու Մասին Յայտարարութիւնը
Մարտ 10-ին, Արցախի խորհրդարանը հրաւիրած է արտահերթ նիստ։ Օրակարգի վրայ եղած է Ազգային ժողովի պատգամաւորներու նախաձեռնութեամբ ներկայացուած Արցախի Հանրապետութեան Ազգային ժողովի յայտարարութիւնը՝ «ԵԱՀԿ Մինսկի խումբի համանախագահութեան, ՄԱԿ-ին եւ համապատասխան կառոյցներուն դիմելու մասին»։
Յայտարարութիւնը ներկայացուցած է պատգամաւոր Գեղամ Ստեփանեան։ Օրակարգային հարցը քննարկուած էր գլխադասային յանձնաժողովի նիստին եւ դրական եզրակացութեամբ ներկայացուած է արտահերթ նիստի քննարկման։
Մտքերու փոխանակութեամբ հանդէս եկած է պատգամաւոր Մետաքսէ Յակոբեան։
ԱՀ արտաքին գործոց նախարար Դաւիթ Բաբայեան, որ հրաւիրուած էր արտահերթ նիստին, տեղեկացուցած է, որ Եւրոպական Միութեան խորհրդարանը ձայներու գերակշիռ մեծամասնութեամբ ընդունած է բանաձեւ՝ «Լեռնային Ղարաբաղի մէջ մշակութային ժառանգութեան ոչնչացման մասին», ուր խստօրէն կը դատապարտէ Ազրպէյճանի շարունակական քաղաքականութիւնը՝ ջնջելու եւ ժխտելու հայկական մշակութային ժառանգութիւնը Լեռնային Ղարաբաղի մէջ։
Յաջորդիւ խորհրդարանը 32 կողմ ձայնով ընդունած է յայտարարութիւնը։