Տիարպեքիրի Սուրբ Սարգիս Եկեղեցին Վերանորոգութեան Մէջ է
Տիարպեքիրի Սուր թաղամասի աւերակ Սուրբ Սարգիս Եկեղեցւոյ վերաշինութեան աշխատանքները արդէն իսկ սկիզբ առած են։ Այս մասին կը հաղորդէ «Ակօս»-ը։
Նշենք որ Սուրբ Սարգիս Եկեղեցւոյ սեփականութիւնն ալ կը պատկանի Սուրբ Կիրակոս Եկեղեցւոյ թաղականութեան։ Թուրքիոյ Հայոց Պատրիարք Սահակ Բ. Մաշալեանի գլխաւորած պատուիրակութիւնը նախորդ տարուայ Հոկտեմբերին այցելած էր Տիարպեքիր։ Այդ այցելութեան ընթացքին հանդիպում մը կայացած էր Կուսակալ Միւնիր Քարալօղլուի հետ եւ այդ հանդիպման ընթացքին ալ օրակարգի վրայ դրուած էր Սուրբ Սարգիս Եկեղեցւոյ նորոգման խնդիրը։
Վերանորգման ծախսերը կը հոգայ Տիարպեքիրի Ներդրումներու Հետապնդման եւ Համակարգման Նախագահութիւնը։ Այս մասին հրահանգ հասած է Տիարպեքիրի Յուշարձաններու Տնօրէնութեան։ Ստորագրուած համաձայնագիրով յայտնի կը դառնայ, թէ այս աշխատանքին համար յատկացուած է 941 հազար 640 թլ ։
Տիարպեքիրի Յուշարձաններու տնօրէն Ճեմիլ Գոչ եւ Սուրբ Կիրակոս Եկեղեցւոյ թաղական խորհուրդի ատենապետ Էրկիւն Այըք այցելելով շինութեան վայր՝ բացատրութիւններ ստացած են կատարուած աշխատութիւններուն մասին։
Ճեմիլ Գոչ յայտնած է, թէ եկեղեցին մինչեւ 1985, կարգ մը պետական հաստատութիւններու կողմէ շահագործուած է իբրեւ պահեստանոց։ Ան նշած է, որ կոթողային կառոյց մը ըլլալով՝ Սուրբ Սարգիս Եկեղեցին Տիարպեքիրի կարեւոր խորհրդանշաններէն մէկն է։ Այս հանգրուանին կը կատարուին նախագիծին հիմքը հանդիսացող ուսումնասիրութիւններ։
«Եկեղեցին պիտի նորոգուի կառուցման շրջանի շինանիւթերով եւ ճարտարապետական դրութիւններով»,- ըսած է Ճեմիլ Գոչ։
Թաղական խորհուրդի ատենապետ Էրկուն Այըք, իր հերթին, ուրախութիւն յայտնած է, թէ այս բազմածախս աշխատանքը կը դիմագրաւուի Կուսակալութեան միջոցներով։