Տերսիմի Հայկական Ամենամեծ Եկեղեցին Աւերակի Վերածուած է

Թուրքիոյ Տերսիմի (Թունջելի) Խոզաթ գաւառի Էրգեն (Գեչիմլի) գիւղին մէջ գտնուող հազարամեայ հայկական եկեղեցին, որ յայտնի է Էրգանի եկեղեցի անունով, անխնամ մնալու հետեւանքով յայտնուած է աւերակ վիճակի մէջ։ Այս մասին ԵՌԱԳՈՅՆ-ը կը տեղեկանայ «Ակունք»-էն։

2012-ին Էրզրումի (Կարին-Ակունքի խմբ․) մշակութային ժառանգութեան պահպանութեան խորհուրդը ընդունած է եկեղեցւոյ պահպանման անհրաժեշտութեան վերաբերեալ Թունջելիի նահանգի մշակոյթի եւ զբօսաշրջութեան վարչութեան ներկայացուցած դիմումը, սակայն մինչ օրս եկեղեցւոյ պահպանման կամ վերակառուցման ուղղուած որեւէ աշխատանք չէ կատարուած։

Էրգանի եկեղեցին կառուցուած է 975-ին։ Եկեղեցւոյ պատերու ներսի հատուածին վրայ դեռ կը պահպանուին հայատառ որոշ արձանագրութիւններ: Էրգանի եկեղեցին կը համարուի Տերսիմի ամենամեծ ու հին հայկական եկեղեցիներէն մէկը։ Յայտնի է, որ Ցեղասպանութեան ժամանակ Էրգանիի վերջին քահանան հրկիզուած եւ սպանուած է եկեղեցւոյ մէջ։ Եկեղեցին չէ գործած 1915 թուականէն ի վեր։