Ապրիլին Հայաստանի Մէջ Արձանագրուած է 6.2% Գնաճ
Հայաստանի սպառողական շուկային մէջ, 2021 Ապրիլին՝ 2020 Ապրիլի համեմատ՝ արձանագրուած է 6.2% գնաճ: Տուեալները այսօր, Մայիս 5-ին, հրապարակած է Վիճակագրական կոմիտէն:
2020 Դեկտեմբերէն գնաճի ընթացքը Հայաստանի մէջ աստիճանաբար արագացած է: Մարտին անիկա կազմած էր 5.8%:
Իսկ 2021 Յունուար-Ապրիլին, 2020 Յունուար-Ապրիլի համեմատ, գնաճը կազմած է 5.4%:
Որոշ ապրանքախումբեր կը շարունակեն սղիլ աւելի մեծ քայլերով՝ քան ընդհանուր գնաճը:
Սննդամթերքը Ապրիլին սղած է 8.3%-ով
2021 Ապրիլին՝ 2020 Ապրիլի համեմատ՝ հանրապետութեան մէջ արձանագրուած է սննդամթերքի եւ ոչ ալքոհոլային խմիչքի 8.3% գնաճ:
- Միրգը սղած է 10.4%-ով,
- Բանջարեղէնը՝ 8.5%-ով,
- Շաքարը՝ 41%-ով,
- Ձուկը եւ ծովամթերքը՝ 9.2%-ով,
- Իւղերը եւ ճարպերը՝ 28.6%-ով, ի դէպ՝ ձէթը սղած է 73.5%-ով,
- Կաթնամթերք, պանիր եւ հաւկիթ ապրանքախումբը՝ 13.4%-ով, մասնաւորապէս հաւկիթը՝ 55.7%-ով,
- Մսամթերքը՝ 4%-ով,
- Ալքոհոլային խմիչքը եւ ծխախոտը՝ 8.8%-ով,
- Հացեղէնն ու ձաւարեղէնը՝ 7.6%-ով,
Ոչ պարենային ապրանքներու գիներ
2021 Ապրիլին՝ 2020 Ապրիլի համեմատ՝ ոչ պարենային ապրանքներու շուկային մէջ արձանագրուած է 8.5% գնաճ:
Մշտապէս քննարկուող պենզինը սղած է 31.1%-ով, իսկ տիզելային վառելիքը՝ 11.1%-ով:
Ծառայութիւններու գիներ
Մատուցուած ծառայութիւններու ոլորտէն ներս 2021 Ապրիլին 2020 Ապրիլի համեմատ արձանագրուած է 2.4% գնաճ: