Մահացած է ՀՀ Արուեստի Վաստակաւոր Գործիչ Վիգէն Ստեփանեանը

Այլեւայլ, Հայաստան

Ուղեղի կաթուածի հետեւանքով՝ 68 տարեկանին՝ մահացած է դերասան, բեմադրիչ, ՀՀ արուեստի վաստակաւոր գործիչ Վիգէն Ստեփանեանը։

Վիգէն Ստեփանեան 1973-ին ընդունուած է Երեւանի Կ․ Ստանիսլաւսկիի անուան թատրոնին կից դերասանական արուեստանոց, ուր մինչեւ 1977 աշխատած է իբրեւ դերասան։ 1977-1989 իբրեւ դերասան աշխատած է Երեւանի Սունդուկեանի անուան ազգային ակադեմիական թատրոնին մէջ։ 1989-ին հիմնած է «Արձագանգ» թատրոն-արուեստանոցը, որ 1991-ին հիմք դարձաւ «Մետրո» թատրոնի, եւ մինչեւ 1994 եղած է թատրոնի գեղարուեստական ղեկավարն ու տնօրէնը։ 1994-2003 աշխատած է Լիբանանի մէջ։ 2003-ին վերադառնալով Հայաստան՝ կրկին ստանձնած է «Մետրո» թատրոնի գեղարուեստական ղեկավարի պաշտօնը։ 2007-ին իբրեւ հրաւիրուած դերասան եւ բեմադրիչ աշխատած է տարբեր թատրոններու մէջ։

2014 Հոկտեմբերին Վիգէն Ստեփանեան նշանակուած է Ալեքսանդր Սպենդարեանի անուան օփերայի եւ պալէի ազգային ակադեմիական թատրոնի բեմադրիչ։

Խաղացած է աւելի քան 100 դեր տարբեր թատրոններու մէջ, բեմադրած է 43 ներկայացում տարբեր երկիրներու մէջ եւ տարբեր լեզուներով, նկարահանուած է մօտ 50 ֆիլմի մէջ, ԽՍՀՄ տարբեր արուեստանոցներու մէջ, խաղացած է աւելի քան 60 հեռուստաներկայացումներու մէջ։