Կեդրոնական Դրամատունը 2020ին Հայաստանի Մէջ 4 Տոկոսի Տնտեսական Անկում Կը Կանխատեսէ
Կեդրոնական դրամատունը նուազեցուցած է 2020-ին Հայաստանի մէջ տնտեսական աճի կանխատեսումը մինչեւ -4 տոկոսի։ Այս մասին լրագրողներու հետ ունեցած հանդիպումին ընթացքին յայտնեց Կեդրոնական դրամատան նախագահ Մարտին Գալստեան։
«Մեկնելով աշխարհի եւ Հայաստանի երկրորդ եռամսեակի տնտեսական խոր անկումէն, ինչպէս նաեւ պայմանաւորուած աւելի դանդաղ վերականգնման սպասումներով, Հայաստանի տնտեսական աճը 2020 թուականի համար վերանայուած է առաջին եռամսեակի 0.7 տոկոս աճէն մինչեւ 4.0 տոկոս անկում։ Միաժամանակ, հիմնական գործոնը, որ կը պայմանաւորի վերականգնման հեռանկարները, բնականաբար, առողջապահական իրավիճակն է աշխարհի եւ Հայաստանի մէջ»,- յայտնեց Մարտին Գալստեան։ Ան նկատել տուաւ, որ, թէեւ Կեդրոնական դրամատունը նուազեցուցած է վերաֆինանսաւորման տոկոսադրոյքը՝ մինչեւ 4.5 տոկոս, կը կարծէ, թէ անհրաժեշտ պիտի ըլլայ շարունակել վարել խթանող դրամավարկային քաղաքականութիւն:
Ըստ Գալստեանի՝ կան միտումներ, որ յառաջիկային տնտեսական աշխուժութեան որոշ վատթարացում տեղի ունենայ, սակայն, պէտք չէ դէպքէն առաջ անցնիլ:
Հայաստանի կառավարութիւնը 2020-ի համար կը նախատեսէր 2 տոկոսի անկում, իսկ Վերակառուցման եւ զարգացման եւրոպական դրամատունը՝ 3.5 տոկոսի անկում։